ArmandaStar: Jas sýretshiler Ulttyq mýzeıde kórme uıymdastyrdy

NUR-SULTAN. QazAqparat - Jastar jyly aıasynda QR Ulttyq mýzeıinde «ArmandaStar» jas sýretshiler kórmesi ashyldy, dep habarlaıdy QazAqparat Ulttyq mýzeıdiń baspasóz qyzmetine silteme jasap.

Respýblıkalyq kórmede Nur-Sultan, Pavlodar, Aqtaý, Aqtóbe, Petropavl qalalarynyń jas kásibı sýretshileri - L. Aıtýarova, D. Áshirbekova, Á. Ámirenova, G. Asqarova, T. Ábenov, N. Bazarbaev, B. Joraev, G. Daıyrova, Á. Káribaeva, A. Nurtazın, N. Imanǵazy, M. Іlııasov, A. Qulahmetova, V. Sergeeva, Á. Hakimova óz týyndylaryn usyndy.

Ekspozıtsııada beıneleý óneriniń keskindeme, músin, sándik-qoldanbaly óner, tsıfrly keskindeme sııaqty túrleri qoıylǵan. Ondaǵy keıbir týyndylar «Armandastar» kórmesi úshin arnaıy salynǵan.

«Elbasy Nursultan Nazarbaev 2019 jyldy Jastar jyly dep jarııalaǵan bolatyn. Osyǵan oraı jastardy qoldaý maqsatynda túrli sharalar uıymdastyrýdamyz. Jastar – ár memlekettiń keleshegi. Búgingi kórme de talantty jastardy qoldaý úshin ashylyp otyr. Qazaqstannyń óneri dúnıe júzine tanylyp keledi, jastardy da osy qatarǵa shyǵarǵymyz keledi. Búgingi kórme - olardyń alǵashqy qadamy, keleshekte bul sýretshiler úlken kórmelerge qatysady», - dedi QR Ulttyq mýzeıiniń dırektory Arystanbek Muhamedıuly.

Sonymen birge, Arystanbek Muhamedıuly kórme qatysýshylaryna arnaıy sertıfıkat tabystady.