«Armandar shańyraǵy»: Erekshe balalarǵa baǵaly syılyqtar úlestiriledi
ASTANA. KAZINFORM – Astana qalasy Nura aýdanynyń ákimdigi Uly Naýryz meıramy qarsańynda «Armandar shańyraǵy» atty áleýmettik aktsııany qolǵa aldy. Oǵan sáıkes, aýdan aýmaǵynda turatyn erekshe balalarǵa baǵaly syılyqtar úlestirilmek.
Aktsııa sheńberinde múmkindigi shekteýli 70 bala aq qaǵazǵa qandaı syılyq qalaıtynyn jazady. Keıin tilek jazylǵan paraqtar metsenattarǵa berilip, jomart jandar balanyń armanyn oryndaıdy.
Mundaı aktsııa «Jansaıa» áleýmettik qyzmet kórsetý ortalyǵynda uıymdastyrylyp, erekshe balalar armanyn qaǵazǵa túsirdi.
Estaı esimdi erekshe balanyń anasy Sandýǵash Nurseıitova aq qaǵazǵa úı jaǵdaıynda qurylatyn batýt suraǵanyn aıtty. Sebebi, dárigerler bala neǵurlym kóp sekirse, soǵurlym densaýlyǵyna paıdaly ekenin eskertken.
«Estaı 7 jasta. Úıdiń kenjesi. Esimin atalaryna uıqastyryp ózim qoıdym. Úsh jastan keıin sóılemeı qaldy. Bıyldan bastap „Jansaıa“ áleýmettik qyzmet kórsetý ortalyǵyna ákep júrmiz. Sebebi, mundaǵy mamandardyń biliktiligi joǵary. Ońaltý sharalary bolsyn, logoped, psıholog, defektolog, mýzykalyq, terapııa, bári-bári kóńilimizden shyǵyp otyr. „Nura aýdany ákimdigi sizderge qoldaý kórsetedi“ degen habardy estip qýanyp qaldyq. Jasyratyny joq, kóp jaǵdaıda erekshe balalar tasada qalyp qoıyp jatady. Batýt suradyq, ol bolmasa velosıped syılasa, bala máz bolyp qalatyn edi. Dárigerler kóp qozǵalýǵa keńes berdi. Sondyqtan da atalǵan syılyqtardy surap otyrmyz. Osy aktsııany uıymdastyrǵan Nura aýdany ákimdigine, jomart azamattarǵa, erekshe balalarǵa erekshe kózqaraspen qaraıtyn „Jansaıa“ áleýmettik qyzmet kórsetý ortalyǵynyń mamandaryna alǵysymyz sheksiz», — deıdi bes balanyń anasy Sandýǵash Nurseıitova.
Taǵdyrdyń taýqymetine tap kelgen múmkindigi shekteýli balalardyń ómirge beıimdelýi ońaı sharýa emes. Munyń barlyǵy úlken qamqorlyqtyń, zor qoldaýdyń, arqasynda ǵana iske aspaq. Búginde erekshe balalarǵa memleket tarapynan kóptegen qoldaý men qamqorlyq kórsetilip keledi. Qoǵam arasynda ózin erkin ustaý, adamdarmen qarym- qatynas qurýda ashyqtyq pen sezimtaldyqty qalyptastyra bilgen múmkindigi shekteýli jandarǵa kórsetiletin qyzmet sapasy jaqsara túsken. Memleket basshysynyń tapsyrmasyna sáıkes, elimizde ońaltý jáne beıimdeý ortalyqtary ashylyp, sapaly qyzmet kórsetýde.
«Jansaıa» áleýmettik qyzmet kórsetý ortalyǵynyń dırektory Erdáýlet Amanbaı Nura aýdany ákimdigine rızashylyǵyn bildirip, mundaı aktsııalardyń jıi ótýin tilek etti.
«Bizdiń ortalyq 2022 jyldyń 1 qańtarynda óz jumysyn bastady. Búginde qala boıynsha 1,5 jastan 18 jasqa deıingi 640 múmkindigi shekteýli bala tirkelgen. Eń birinshi kezekte áleýmettik qyzmetkerler úı jaǵdaıynda 8 arnaýly qyzmetti kórsetedi. Budan bólek, ortalyqta túrli ońaltý sharalary qarastyrylǵan. Basseın, bı úıirmesi sııaqty túrli baǵyttaǵy ońaltý jumystary bar. Munda kúnine 70-ten astam bala keledi. Erekshe balalardy nazardan tys qaldyrmaı, qoldaý kórsetip jatqan Nura aýdany ákimdigine, metsenat azamattarǵa alǵysymyz zor», — dedi ortalyq basshysy.
Aıta keteıik, syılyqtar 21 naýryzǵa deıin tabystalmaq.
