«Armandar oryndalady»: Qarapaıym jumysshylar teatrda óner kórsetedi
ASTANA. KAZINFORM – Elordada alǵash ret jumysshy mamandyq ıeleri teatr sahnasyna shyǵyp, kórermenge erekshe qoıylym usynbaq. «Armandar oryndalady» dep atalatyn bul joba bıylǵy Qala kúni qarsańynda sahnalanady. Qoıylym ujymy «Jibek joly» telearnasynyń «Búgin LIVE» baǵdarlamasyna qonaq bolyp, erekshe jobany tanystyrdy.
– Bul bizdiń kórkemdik jetekshimiz Tursynbek Qabatovtyń burynnan oıynda júrgen ıdeıa edi. Biraq bul ıdeıa solaı pisý kerek boldy. 2025 jyldy Prezıdentimiz «Jumysshy mamandar jyly» dep jarııalaýyn kútken sekildimiz, - dedi qoıylym avtory ári rejıseri Nurjigit Músilimov.
Jobanyń da, qoıylymnyń da ataýy – «Armandar oryndalady». Bul ataý jaı ǵana tańdalyp qoıylmaǵan. Onyń artynda myńdaǵan adamnyń oryndalmaı qalǵan arman-joly jatyr.
– Keıde taksıde júrgende, ne ózge jerlerde adamdarmen áńgime aıtyp qalsaq, akter ekenimizdi estigende olar «Men de kezinde akter, óner adamy bolǵym kelgen, biraq áke-sheshem ruqsat bermedi, túrli jaǵdaılar bolyp, óner jolyna túspedim» dep aıtyp jatady. Biz sol áńgimelerdi estip, sol kisilerdiń armanyn oryndaǵymyz kelip, jobanyń atyn «Armandar oryndalady» dep qoıdyq, - deıdi rejısser.
Qoıylym sıýjeti jumysshy mamandar turatyn jataqhanadaǵy ómirmen baılanysty. Ashanada bas qosqan túrli maman ıeleri baıqaýǵa qatysyp, óz mamandyqtarynyń mańyzyn dáleldeýge tyrysady.
– Bul shyǵarmada kózge kórinbeıtin salalar da jańa qyrynan ashylady. Jataqhanada turǵandyqtan, bul keıipkerlerdiń armany – páter. Al fınaldy kelip kórińizder, - dedi Músilimov.
Joba erekshe formatta – kásibı emes adamdarmen jumys isteýge negizdelgen. Qoıylym sahnasynda 12 adam óner kórsetedi. Olarǵa 4 kásibı akter jáne eki rejısser kómek kórsetip jatyr.
– Akter emes adamdarmen jumys isteý qıyn. Biraq maǵan 4 kásibı akter kómektesedi. Menen bólek akter sheberliginen sabaq beretin taǵy bir rejısser bar, - dedi ol.
Qoıylym aldynda kastıng eki ret ótkizilgen.
– Birinshi kastıngte jumysshy mamandyqtardy shaqyrdyq. Ol kezde jýrnalıster, muǵalimder, dárigerler bolǵan joq. Jumysshy mamandar jumystaryna baılanysty daıyndyqqa tolyq qatysa almady. Sondyqtan, aýqymyn keńeıtip, ekinshi ret kastıng jasaýǵa týra keldi, - dep túsindirdi rejısser.
Osy joba arqyly armanyn oryndaǵan 85 mektep-lıtseıiniń muǵalimi Maıra Esenova kastıng jaıly Instagram-nan estip, ózin synap kórýge bel býǵan.
– Biz kastıngtiń bolatynyn Ázirbaıjan Mámbetov atyndaǵy teatrdyń Instagram paraqshasynan kórdik. Solaı biz de qatysyp, baǵymyzdy synap kóreıik dep sheship, kastıngke keldik. Kastıng 2 márte ótti. Kastıngke biraz adam qatysty, - dedi ol «Búgin LIVE» efırinde.
Qazir daıyndyq qyzý júrýde. Kúnine birneshe saǵattyq jattyǵýlarǵa qaramastan, qatysýshylar qoıylymnan erekshe áser alyp júr.
– Jumys barysy ózimizge unaıdy. Ońaı deýge de kelmeıdi, qıyn tustary da bar. Nurjigit myrza qazir bizben jumys istep jatyr. Daıyndyqqa kúnine 3-4 saǵat ýaqyt ketedi. 1 aıda qarapaıym jumysshylardan akter jasap shyǵarý ońaı emes. Sondyqtan ujymǵa kóp rahmet aıtamyz, - deıdi Maıra.
Aıta keteıik, qoıylymnyń tusaýkeseri 5-6 shilde kúnderi saǵat 18:00-de Ázirbaıjan Mámbetov atyndaǵy memlekettik drama jáne komedııa teatrynda ótedi.
Esterińizde bolsa, buǵan deıin Pavlodardaǵy Aımaýytov teatry 36-shy maýsymyn qorytyndylaǵanyn jazǵan edik.
Al búlin Qyzylordada akademııalyq teatr jetpisinshi maýsymyn aıaqtady.