«Arman» sporttyq-saýyqtyrý lagerinde jazǵy maýsym ashylady
ASTANA. QazAqparat - Erteń «Arman» sporttyq-saýyqtyrý lagerinde (Aqmola oblysynyń Aqkól q.) jazǵy maýsym ashylady, dep habarlady Astana qalalyq bilim basqarmasynan.
Vedomstvo aqparatyna sáıkes, saltanatty sharaǵa Astana qalasy Bilim basqarmasynyń jetekshisi Q.Senǵazyev jáne mektep dırektorlary qatysady. Bıylǵy maýsymnyń ashylýy «Kúlmeıtin hanshaıym» ertegisiniń jelisi boıynsha daıyndalǵan. Keıipkerlerdi №1 balalar mýzykalyq mektebiniń tárbıelenýshileri men ustazdary somdaıdy.
Shara barysynda árbir jasaq ózderin qysqasha tanystyrady. Mýzykalyq mekteptiń tárbıelenýshilerimen qatar lagerde demalyp júrgen balalar da óz ónerlerin ortaǵa salyp, án men bıden shashý shashady. Demalys ornyndaǵy tálimgerler akrobatıkalyq etıýdti jáne basqa shyǵarmashylyq nómirlerdi kórermen nazaryna usynady. Merkelik baǵdarlamanyń sońy «Men tálimgermin!» fleshmobyna ulasyp, balalardyń kómegimen Kúlmeıtin hanshaıym dertinen aıyǵady.
Atap ótken jón, 6 maýsymnan bastap 12 tamyz aralyǵynda lagerde jazǵy ýaqytta 5 aýysym uıymdastyrylady (árbir aýysymda 330 bala, jalpy jazǵy kezeńde 1650 bala qamtylady). 5 aýysymnyń úsheýi jetim balalar, az qamtylǵan jáne kóp balaly otbasylardan shyqqan balalarǵa, sonymen qatar basqa áleýmettik turǵydan qorǵalmaǵan toptar úshin tegin uıymdastyrylady. 6-17 maýsym aralyǵynda lagerde 235 bala tegin demalady jáne saýyǵady.
Bıyl aqyly maýsymdarǵa joldamanyń quny 12 kún úshin 32 myń teńgeni qurap otyr. Oǵan jolaqy, lagerde turý, bes mezgil tamaqtaný, mádenı-buqaralyq jáne sporttyq-saýyqtyrý sharalaryn ótkizý kiredi. Lagerdiń aýmaǵynda basseın, saýna bar. Ótken jyly jıhazy jańartyldy.
