Arman Shoraev: «Qazaqstan Barysy» bes jyl ishinde kórermender asyǵa kútetin úlken dodaǵa aınaldy
ASTANA. QazAqparat - «Qazaqstan Barysy» bes jyldyń ishinde kórermender asyǵa kútetin úlken dodaǵa aınaldy. Bul týraly búgin Ortalyq kommýnıkatsııalar qyzmetindegi baspasóz máslıhatynda QR Qazaq kúresi federatsııasynyń prezıdenti Arman Shoraev málim etti.
«Bıylǵy «Qazaqstan Barysy» dodasyn ótkizgeli otyrmyz. Erteń saǵat 12:00 kezinde bastaımyz. Osy bes jyldyń ishinde kórermender asyǵa kútetin úlken dodaǵa aınaldy dep oılaımyn», - dedi A.Shoraev.
Osy oraıda ol sońǵy jyldary Qazaqstan boıynsha eń myqty degen balýandar iriktelgenin atap ótti.
Óz kezeginde «Samuryq-Qazyna» ulttyq ál-aýqat qory» AQ jurtshylyqpen baılanys jónindegi bas dırektory Darhan Qaletaev bul jobaǵa qor 2011 jyldan beri qoldaý kórsetip kele jatqanyna toqtala kele: «Árıne, biz bul jobaǵa demeýshi retinde ǵana qarap otyrǵan joqpyz, ıaǵnı oǵan ulttyq joba retinde úles qosqymyz keledi. Ulttyq sporttyń damýyna qoldaý jasaǵymyz keledi. Bizdiń oıymyzsha, bıylǵy doda nátıjeli ótedi», - dedi.
Osymen besinshi márte jalaýy jelbireıtin bıylǵy «Qazaqstan Barysy» týrnıriniń irikteý syndary elimizdiń barlyq aımaǵynda máresine jetip, júzden júırik atanǵan eń myqty 33 balýan shildeniń 4-i kúni Astanada ózara beldesedi.
Astana kúnine oraı uıymdastyrylǵaly otyrǵan dodaǵa elimizdiń 14 oblysy men Astana jáne Almaty qalalarynan top jarǵan 32 balýan men 2014 jylǵy «Qazaqstan Barysy» atanǵan Muhıt Tursynov 4 shildede elorda tórindegi «Saryarqa» respýblıkalyq velotreginde kúsh synasady.
