Arman Shoraev: Qazaq kúresi federatsııasy 29 elde ashyldy
NUR-SULTAN. QazAqparat - Álemniń 29 elinde Qazaq kúresi federatsııasy ashyldy. Bul týraly OKQ-da ótken baspasóz máslıhatynda QR qazaq kúresi federatsııasynyń prezıdenti Arman Shoraev málim etti, dep habarlaıdy QazAqparat tilshisi.
«Bizde osydan eki jarym jyl buryn Halyqaralyq Qazaq kúresi federatsııasy qurylǵan bolatyn. Ony Qanat Bozymbaev myrza basqaratynyn bilesizder. Sol eki jyldyń ishinde qazaq kúresiniń 29 memlekette resmı túrde federatsııasy ashyldy. Resmı degen sóz - ol federatsııalardyń sol eldiń mınıstrlikterine tirkelgenin, jergilikti Olımpıada komıtetiniń akkredıtatsııasyn alǵanyn bildiredi. Bizdiń maqsatymyz - kem degende 65 memlekette qazaq kúresi federatsııasynyń ashylýyna qol jetkizý. Ol degenińiz - bolashaqta qazaq kúresin Olımpıada oıyndarynyń sapyna engizemiz desek, osy 65 federatsııa - sol joldaǵy alǵashqy qadamdardyń biri bolmaq», - deıdi ol.
Arman Shoraevtyń aıtýynsha, 8 maýsymda, ıaǵnı «Qazaqstan barysy» týrnıri ótip jatqan kúni Polshada qazaq kúresinen Eýropa chempıonaty ótedi.
«Federatsııasy bar 29 eldiń jartysynan kóbi - Eýropa elderi. Frantsııa, Germanııa, Polsha men Italııada bar degen sııaqty... Olardyń bári de Eýropa chempıonatyna qatysady. Sondyqtan, ol jaǵynan júrgizilip jatqan jumystyń qarqyny jaman emes. Byltyr «Qazaqstan barysy» atanǵan palýanymyz Erjan Shankeev bıylǵy týrnırge eshqandaı irikteýsiz qatysady. Aıbek Nuǵymarov ta Shyǵys Qazaqstan oblysynan irikteýden ótti. Jobamyz áleýmettik lıftige aınalsa eken dep jumysty qolǵa aldyq. Qudaıǵa shúkir, oıymyz júzege asty. Balýanymyz Aıbek Nuǵymanov Semeı qalasyndaǵy eń úlken kolledjdiń dırektory bolyp taǵaıyndaldy. Beıbit Ystybaev baýyrymyzda dál solaı. Ol óziniń týǵan jeri Jambyl oblysynda basshylyq qyzmette. Osy jigitter juldyzǵa aınalyp, tanymaldylyqqa ıe boldy. Qudaıǵa shúkir maqsatymyzǵa jettik», - dedi Arman Shoraev.
Onyń aıtýyna qaraǵanda, 9 jyldyń ishinde ulttyq kúrespen aınalysatyn balýandardyń sany 4 esege kóbeıip, 130 myńnan asqan.
Eske sala ketsek, «Qazaqstan barysy» týrnır bıyl 8 maýsymda «Barys-Arenada» ótkiziledi.
