Arman Shaqqalıev ishki naryqty qoldaý úshin qabyldanǵan sharalardy atady
ASTANA. KAZINFORM – Qytaı, Ýkraına jáne Úndistannan keletin ónerkásiptik taýarlarǵa qatysty dempıngke qarsy 6 shara uzartyldy. Bul týraly Saýda jáne ıntegratsııa mınıstrliginiń keńeıtilgen alqa májilisinde vedomstvo basshysy Arman Shaqqalıev aıtty.

- Memleket basshysy otandyq óndirýshilerdi qorǵaý boıynsha retteýshi sharalardy ázirleýdi tapsyrdy. Іshki naryqty qorǵaý jáne otandyq taýar óndirýshilerdi qoldaý maqsatynda tarıftik jáne tarıftik emes retteý sharalary, sondaı-aq otandyq taýar óndirýshilerdi qorǵaý sharalary qabyldandy. Tarıftik retteý sharalary bóliginde Eýrazııalyq ekonomıkalyq komıssııanyń ımporttyq kedendik baj mólsherlemelerin belgileý jáne ózgertý jónindegi 24 sheshimi qabyldandy. Tarıftik emes retteý sharalary bóliginde otandyq óndirýshilerdi qorǵaý jáne ishki naryqty taýarlardyń jekelegen túrlerimen qamtamasyz etý maqsatynda ótken jyly ımport jáne eksportqa 20-ǵa jýyq tyıym salýlar men shekteýler engizildi. Qorǵaý sharalary bóliginde Qytaı, Ýkraına jáne Úndistannan keletin ónerkásiptik taýarlarǵa qatysty dempıngke qarsy 6 shara uzartyldy, - dedi mınıstr.
Onyń atap ótýinshe, ishki naryqty qorǵaý úshin tehnıkalyq retteý jáne tutynýshylardyń quqyqtaryn qorǵaý quraldary belsendi qoldanylady. Otandyq ónimdi rastaý úshin Qazaqstanda shyǵarylǵan taýarlar tizilimi engizilip jatyr. Bul - memlekettik qoldaý sharalaryna qol jetkize alatyn óndirýshilerdiń biryńǵaı pýly. Tıisti zań jobasy Parlament Májilisiniń 1-oqylymynda maquldandy. Sonymen qatar mınıstrlik janynan Saýdadaǵy tehnıkalyq kedergiler, sondaı-aq qaýipsiz ónimdi ákelý jáne aınalym máseleleri boıynsha ahýaldyq shtab quryldy.
- Qus eti, sút jáne et ónimderi shekara mańyndaǵy ótkizý pýnktterinde 600 myń tonnadan astam mal sharýashylyǵy ónimi kúsheıtilgen baqylaýda tekserilip, myńǵa jýyq kólik keıin qaıtaryldy jáne myńnan astam sertıfıkat joıyldy. Tutynýshylardy sapasyz jáne qaýipti ónimderden qorǵaýǵa baǵyttalǵan «Sapaly ónim» áleýmettik jobasy iske qosyldy. Joba aıasynda 2 myńnan astam ónim túri satyp alynyp, tekserildi. Onyń ishinde 1,5 myńnan tańbalaý men sanıtarlyq-epıdemıologııalyq talaptardyń buzylýy anyqtaldy. Anyqtalǵan buzýshylyqtar boıynsha 392 kásipkerlik sýbektisi ákimshilik jaýapkershilikke tartyldy. Іshki naryqty qorǵaý boıynsha qabyldanyp jatqan sharalar oń saýda balansyn jaqsartýǵa yqpal etti, - dedi Arman Shaqqalıev.
Buǵan deıin Arman Shaqqalıev saýda mınıstrliginiń basym mindetterin ataǵanyn jazǵan edik.