Arman Shaqqalıev saýda mınıstrliginiń basym mindetterin atady
ASTANA. KAZINFORM — Bıyl saýda saıasatyn damytý tujyrymdasy ázirlenedi. Bul týraly Saýda jáne ıntegratsııa mınıstrliginiń keńeıtilgen alqa májilisinde vedomstvo basshysy Arman Shaqqalıev aıtty.

— Mınıstrliktiń 2025 jylǵa arnalǵan negizgi syn-qaterleri men basym mindetterin atap ótkim keledi. Bárińizge málim, Memleket basshysy belgilegen strategııalyq baǵytty oryndaý úshin Úkimetke Jalpy ishki ónimdi eki esege arttyrý jóninde úlken mindet qoıǵan bolatyn. Osy jyly ekonomıkanyń 6-7 paıyz deńgeıinde ósýin qamtamasyz etý mindeti tur, — dedi mınıstr.
Onyń atap ótýinshe, alǵa qoıylǵan mindetterge qol jetkizý úshin saýda saıasaty úsh strategııalyq basymdyqty iske asyrýǵa baǵyttalady. Birinshisi — saýda ashyq bolýyna jáne onyń ónimdiligin arttyrýǵa baǵyttalǵan qazirgi zamanǵy saýda ekojúıesin qalyptastyrý. Mundaǵy basty mindet — tsıfrlyq transformatsııa. Bizge taýarlardy, saýda obektilerin, saýda aǵyndaryn tsıfrlandyrý qajet. Saýdanyń «tsıfrlyq aınasyn» jasaý jáne taýarlardyń qadaǵalaýyn qamtamasyz etý kerek. Sondaı-aq bırjalyq jáne elektrondyq saýda quraldaryn damytý qajet.
— Ekinshiden, ishki jáne syrtqy naryqtarda otandyq taýarlardy ilgeriletý maqsatynda ımportqa táýeldilikti tómendetýge jáne otandyq óndirýshilerdiń pozıtsııalaryn nyǵaıtýǵa baǵyttalǵan tetikterdi engizýge erekshe nazar aýdarýymyz qajet. Eksporttyq saıasatqa qatysty qosylǵan quny joǵary jobalardy ilgeriletýge, sondaı-aq memlekettik qoldaý sharalarynyń tıimdiligin arttyrýǵa kúsh-jigerdi jumyldyra otyryp, eksporttyq qoldaý tásilderine ózgeris engizý kerek. Úshinshi — tutynýshylardyń quqyqtaryn jan-jaqty qorǵaý, taýarlar jáne qyzmetterdiń qaýipsizdigi men sapasyn jetildirý. Úkimettiń tapsyrmasy boıynsha mınıstrlik saýda saıasatyn damytý tujyrymdamasyn ázirlep, joǵaryda kórsetilgen tásilder men olardy iske asyrý jónindegi sharalardy qoldanatyn bolady, — dedi Arman Shaqqalıev.
Osyǵan deıin QR Saýda jáne ıntegratsııa mınıstri Arman Shaqqalıev sıyr etiniń baǵasy ne sebepti kúrt artqanyn túsindirdi.