Arman Shaqqalıev kóterme saýda ókilderimen azyq-túlik naryǵyndaǵy deldaldardy qysqartý máselesin talqylady

Jumys sapary barysynda mınıstr «Alash» jáne «Sharyn» kóterme saýda bazarlaryna, kókónis qoımalaryna jáne «Kerýen joly» bazaryndaǵy demalys kúnderi uıymdastyrylatyn jármeńkege bardy.

Sapar barysynda mınıstr iri kóterme jetkizýshilermen, kásipkerlermen jáne bazar ákimshilikterimen kezdesti. Kezdesýde saýda ınfraqurylymyn damytý, kedendik rásimderden ótý, fıtosanıtarııalyq baqylaýdy jetildirý jáne azyq-túlik ónimderiniń úzdiksiz jetkizilýin qamtamasyz etý máseleleri talqylandy. Sonymen qatar Premer-Mınıstrdiń saýda salasynda tártip ornatý jáne ónimsiz deldaldardy qysqartý jónindegi tapsyrmasyn oryndaý máselesine erekshe nazar aýdaryldy.

Búginde Úkimet taýar ótkizý tizbekteriniń ashyqtyǵyn arttyrý jáne qosylǵan qun qalyptastyrmaıtyn deldaldyq shemalardy joıý baǵytynda júıeli jumys júrgizip jatyr. Osy maqsatta óńirlerdegi baǵa qalyptasýyna eleýli yqpal etetin elimizdiń 63 iri bazary aıqyndaldy.

- Negizsiz ústemeaqynyń árbir teńgesi azamattardyń otbasylyq bıýdjetine tikeleı áser etedi. Sondyqtan taýar ótkizý tizbekterinde tártip ornatý tek ekonomıkalyq emes, áleýmettik mańyzy bar mindet. Bazarlar eldiń azyq-túlik qaýipsizdigin qamtamasyz etýdegi mańyzdy býyndardyń biri. Óıtkeni tutynýshylyq suranystyń edáýir bóligi men baǵa baǵdarlary dál osy jerde qalyptasady, – dedi Arman Shaqqalıev.

Mınıstrdiń aıtýynsha, qazirgi ýaqytta elordadaǵy baǵa turaqty. Sonymen qatar jaz mezgilinde mınıstrlik ınflıatsııalyq qysymdy odan ári tómendetý jáne áleýmettik mańyzy bar azyq-túlik taýarlary baǵasynyń negizsiz ósýine jol bermeý baǵytyndaǵy jumysty jalǵastyrady.

- Biz qala ortalyǵynda birneshe jármeńke alańyn ashýdy josparlap otyrmyz. Onda qoımalarymyzdaǵy ónimder turǵyndarǵa tikeleı satylatyn bolady. Bul taýardyń kóterme jetkizýshiden tutynýshyǵa deıingi jolyn qysqartyp, deldaldyq ústemeaqylardy azaıtýǵa múmkindik beredi. Qazirgi ýaqytta qala ákimdigimen birlesip mundaı saýda núktelerin ornalastyrý oryndary pysyqtalyp jatyr, – dedi «Alash» kóterme saýda bazarynyń dırektory Nurlan Jumekov.

Áleýmettik mańyzy bar azyq-túlik taýarlaryna qoıylatyn saýda ústemeaqylary boıynsha zańnama talaptarynyń saqtalýyna erekshe kóńil bólinip otyr. Jyl basynan beri júrgizilgen baqylaý is-sharalarynyń nátıjesinde jalpy somasy 76,8 mln teńgeni quraıtyn 2 463 ákimshilik qaýly shyǵaryldy. Onyń ishinde 1 628 qaýly áleýmettik mańyzy bar azyq-túlik taýarlaryna belgilengen shekti saýda ústemeaqysyn asyrý faktilerine qatysty. Atalǵan quqyq buzýshylyqtar boıynsha salynǵan aıyppuldardyń jalpy somasy 52 mln teńgeden asty.

Mınıstr memleket adal básekelestikti damytýǵa jáne naryq qatysýshylary úshin teń jaǵdaı jasaýǵa múddeli ekenin atap ótti.

- Bizdiń maqsatymyz – bıznes úshin qosymsha kedergiler jasap, ákimshilik qysymdy kúsheıtý emes. Memleket adal kásipkerlerdi qoldaıdy jáne barsha naryq qatysýshylary úshin ashyq ári túsinikti oıyn erejelerin qalyptastyrýǵa múddeli. Alaıda mundaı qoldaý zań talaptary saqtalǵan jaǵdaıda ǵana kórsetiledi. Eger jekelegen bazar ákimshilikteri nemese saýda sýbektileri jasyryn shemalardy qoldanýdy, jetkizý tizbekterin jasyrýdy, negizsiz saýda ústemeaqylaryn belgileýdi nemese zań talaptaryn elemeýdi jalǵastyrsa, memleket zańnamada kózdelgen barlyq yqpal etý sharalaryn dáıekti túrde qoldanatyn bolady, – dedi Arman Shaqqalıev.

Mınıstr sondaı-aq Memleket basshysy aıqyndaǵan «Zań jáne tártip» qaǵıdaty saýda salasyn qosa alǵanda, ekonomıkanyń barlyq sektorynda múltiksiz saqtalýy tıis ekenin eske saldy. Barlyq naryq qatysýshylary úshin ortaq erejeler men teń jaýapkershilik ádil básekelestik ortany qalyptastyrýdyń jáne halyqty qoljetimdi azyq-túlikpen qamtamasyz etýdiń negizgi sharttarynyń biri.

Buǵan deıin elektrondyq saýda operatory uǵymy engiziletinin jazǵan bolatynbyz.