Arman Shaqqalıev Berlındegi Grüne Woche kórmesinde Qazaqstannyń Ulttyq pavılonyn ashty
ASTANA. KAZINFORM – Berlınde ótken Grüne Woche kórmesiniń 100 jyldyq mereıtoıy jáne Global Forum for Food and Agriculture (GFFA) konferentsııasy aıasynda Qazaqstan agroónerkásiptik keshen men saýda salasynda senimdi seriktes retinde óz pozıtsııasyn kórsetti. Bul týraly Saýda jáne ıntegratsııa mınıstrliginiń baspasóz qyzmeti habarlady.
Qazaqstan delegatsııasyn basqarǵan Saýda jáne ıntegratsııa mınıstri Arman Shaqqalıev agrarlyq saıasat, bıznes jáne halyqaralyq uıymdar ókilderiniń qatysýymen ótken negizgi sharalarǵa qatysty.
Kórmede Qazaqstannyń Ulttyq pavılony ashylyp, ol eksporttyq áleýetti tanystyrý jáne ónerkásiptik kooperatsııanyń bolashaǵyn talqylaý alańy retinde qyzmet etti. Pavılonda aýyl sharýashylyǵy ónimderin óndirý men tereń óńdeý, zamanaýı agrotehnologııalardy engizý, sondaı-aq ornyqty agrojúıelerdi damytý múmkindikteri keńinen kórsetildi. Pavılonǵa nemis jáne halyqaralyq seriktester tarapynan joǵary qyzyǵýshylyq baıqalyp, qazaqstandyq ónimder men birlesken jobalarǵa suranystyń artqany rastaldy.
GFFA aıasynda Arman Shaqqalıev Germanııanyń Azyq-túlik, aýyl sharýashylyǵy jáne óńirlik sáıkestik jónindegi federaldyq mınıstri Aloıs Raıner, Germanııanyń Ekonomıka jáne energetıka federaldyq mınıstrliginiń stats-hatshysy Tomas Shtefen, Nemis ekonomıkasynyń Shyǵys komıtetiniń atqarýshy dırektory Mıhael Harms jáne Dúnıejúzilik saýda uıymy Bas dırektorynyń orynbasary Jan-Marı Paýgammen ekijaqty kezdesýler ótkizdi. Kezdesýlerde saýdany keńeıtý, kedergilerdi azaıtý, azyq-túlik jetkizý tizbekteriniń turaqtylyǵy jáne naryqtardaǵy ózara qatysýdy arttyrý máseleleri qaraldy.
Agrarlyq yntymaqtastyq pen tehnologııalyq seriktestikti damytýǵa arnalǵan kezdesýlerde Qazaqstan delegatsııasy Pákistannyń Ulttyq azyq-túlik qaýipsizdigi jáne zertteýler jónindegi federaldyq mınıstri Rana Tanvır Hýsseın, Germanııanyń Aýyl sharýashylyǵy federaldyq mınıstrliginiń memlekettik hatshysy Markýs Shık, Nemis agrobıznes alıansynyń dırektory Per Broderzen, CLAAS kompanııasynyń Shyǵys Eýropa men Ortalyq Azııa óńiri boıynsha vıtse-prezıdenti Mıhael Baıer, sonymen qatar APD jáne ADT jobalarynyń jetekshilerimen kezdesti. Kezdesýlerde óndiristi jergiliktendirý, aýyl sharýashylyǵy tehnıkasyn jańǵyrtý, nemis sapa standarttaryn engizý, tuqym sharýashylyǵyn damytý jáne sý únemdeý tehnologııalary talqylandy.
Qazaqstan delegatsııasy Nemis agrobıznes alıansy uıymdastyrǵan salalyq pikirtalastarǵa belsendi qatysty. Olardyń ishinde ornyqty sý paıdalaný men ınnovatsııalyq agrotehnologııalarǵa arnalǵan paneldik sessııa jáne «Kazakhstan–Germany Agro & Water Nexus» dóńgelek ústeli boldy. Bul formattar taraptarǵa naqty kooperatsııa úlgileri, birlesken pılottyq jobalar men tehnologııa transferi máselelerin qarastyrýǵa múmkindik berdi.
Іs-sharalar barysynda Qazaqstan men Germanııa arasyndaǵy saýda-ekonomıkalyq baılanystardyń nyǵaıýy atap ótildi. 2025 jyldyń qańtar–qarasha aılarynyń qorytyndysy boıynsha eki el arasyndaǵy taýar aınalymy 3,91 mıllıard AQSh dollaryn qurady. Qazaqstannyń Germanııaǵa eksporty 7,9 paıyzǵa ósip, 1,17 mıllıard AQSh dollaryna jetti. Bul kórsetkishter nemis naryǵynyń qazaqstandyq jetkizýshiler men joǵary qosylǵan quny bar ónimderge turaqty qyzyǵýshylyǵyn bildiredi.
Qazaqstan Respýblıkasynyń Saýda jáne ıntegratsııa mınıstrligi habarlaǵandaı, sapardyń mańyzdy nátıjeleriniń biri – Arman Shaqqalıev pen Nemis ekonomıkasynyń Shyǵys komıtetiniń atqarýshy dırektory Mıhael Harms arasynda naýryz aıynda bıznes pen salalyq vedomstvolardyń qatysýymen beınekonferentsııa ótkizý týraly kelisimge qol jetkizý boldy. Bul konferentsııada agroónerkásiptik keshen men eksportqa baǵyttalǵan salalardaǵy naqty kooperatsııalyq jobalar talqylanatyn bolady. Sonymen qatar, sáýir aıynda Germanııa delegatsııasynyń Qazaqstanǵa sapary josparlanyp otyr, onyń barysynda birlesken ınvestıtsııalyq jáne óndiristik bastamalarǵa basymdyq beriledi.
Eske sala keteıik, buǵan deıin Qazaqstan Respýblıkasynyń Ulttyq pavılony aıasynda 61‑shi Venetsııa bıennalesinde kórme ótkizý konkýrsynyń birinshi kezeńiniń nátıjesi belgili bolǵanyn jazǵanbyz.