Arman Rysbektiń soqqysynan grýzııalyq boksshy tura almaı qaldy

ASTANA. QazAqparat - Qazaqstandyq kásipqoı boksshy Arman Rysbek grýzııalyq Sandro Terashvılıdi birinshi raýndta nokaýtqa jiberdi. Qos boksshy búgin Astanada ótip jatqan Beıbit Shúmenov pen Hamıt Altynkaı aıqasynyń anderkartynda kezdesti, dep habarlaıdy QazAqparat tilshisi.

Birinshi raýndtan bastap, Arman Rysbek birneshe qaýipti shabýyl jasaǵanymen, qarsylasynyń qorǵanysy syr bildirmeıtin kóringen. Terashvılıdiń tynymsyz shabýyldan mazasy ketken bolýy kerek. Urymtal sátterdiń birinshe ashylyp, soqqy jasar kezde Armannyń aýyr soqqysy oǵan týra tıdi. Sandro aýyr soqqydan tura almaı qaldy.

Arman Rysbek osylaısha kásipqoı bokstaǵy tórtinshi jeńisine qol jetkizdi. Sharshy alańdaǵy úshinshi nokaýty otandasymyzdyń kásipqoı boksta bolashaǵy zor ekenin baıqatady. Terashvılı bolsa, óz ómirindegi alty aıqastyń ekeýinde qarsylastaryna ese jiberip aldy.