Arman Rysbek alǵashqy jekpe-jekten keıin-aq álemdik reıtıngke endi
ASTANA. QazAqparat - Bedeldi BoxRec.com saıty qazaqstandyq kásipqoı boksshy Arman Rysbektiń (1-0, 1 KO) profılin jańartty, dep habarlaıdy Sports.kz.
Armannyń kásipqoı bokstaǵy alǵashqy jekpe-jegi eki ret keıinge shegerilgen bolatyn. Aqyry jaqynda AQSh-tyń Kıssımmı qalasynda amerıkalyq Djon Morhaýspen kezdesý ótkizdi. Ol da kásipqoı boksqa alǵash shyǵyp turǵan boksshy. Bul jekpe-jek áýelde 4 raýndqa josparlanǵanymen, birinshi raýnda qazaqstandyq bylǵary qolǵap sheberiniń jasaǵan nokaýtymen aıaqtalǵan bolatyn.
Kezdesý qorytyndysy boıynsha BoxRec Armandy reıtıngte orta salmaq sanaty boıynsha 982-orynǵa qoıypty. Al bul dıvızıonda jalpy 1053 boksshy bar.
Aıta keteıik, bul salmaq reıtınginde 4 chempıondyq beldigi (WBA Super, WBC, IBF, IBO) bola tura Gennadıı Golovkın (37-0-1, 33 KO) ekinshi tur. Al birinshi orynǵa meksıkalyq Saýl Alvares (49-1-2, 34 KO) jaıǵasqan.
