Arman Ospanov ta áskerı sambodan ekinshi márte álem chempıony atandy!
ASTANA. QazAqparat - Marokkonyń Kasablanka qalasynda márege jetken sambodan álem chempıonatynda qazaqstandyq Arman Ospanov 68 keli salmaqta reseılik Rashad Mýradovpen fınalda kúresti.
Halyqaralyq sambo federatsııasynyń resmı saıtynan tikeleı efırde kórsetkenindeı, tartysty ótken Arman men Rashadtyń básekesi 1:1 esebimen teń aıaqtaldy. Biraq sońǵy upaıdy A.Ospanov alǵandyqtan, ol jeńimpaz atandy. Sóıtip Arman Ospanov 2014 jyly Japonııanyń Narıta qalasynda ótken álem birinshiligindegi chempıondyq ataǵyn bul joly da saqtap qaldy. Eske sala keteıik, buǵan deıin osy dúnıejúzilik dodada Beıimbet Qanjanov sporttyq sambodan, Almas Súleımenov áskerı sambodan álem chempıony ataǵyna qol jetkizgen bolatyn. Sondaı-aq batysqazaqstandyq Temirlan Ihsanǵalıev áskerı sambodan kúmis júldeni enshiledi. Sporttyq sambodan Eset Qýanov úshinshi orynǵa kóterilse, áıelder arasynda Aıgúl Baıqulova men Gaýhar Turmahanova kúmis, Dildásh Quryshbaeva qola medaldi ıelendi. Sóıtip Qazaqstan quramasy bul álem chempıonatynan úsh altyn, sonsha kúmis, qos qola júldeni qorjynǵa saldy.
