Arman Qyryqbaev: Astana - Elbasynyń basty megajobasy
ALMATY. QazAqparat - Almaty qalasy ákiminiń orynbasary Arman Qyryqbaev búgin «Nazarbaev modeli» ǵylymı konferentsııasynda Astana Elbasynyń basty megajobasy dep atady, dep habarlaıdy QazAqparat tilshisi.
Búgin Ál-Farabı atyndaǵy Qazaq ulttyq ýnıversıtetinde «Nazarbaev modeli» ǵylymı konferentsııasy ótti. Konferentsııa QR Tuńǵysh Prezıdenti - Elbasy kitaphanasynyń «N.Nazarbaev: dáýir, tulǵa, qoǵam» kóshpeli bilim berý jáne mádenı-aǵartýshylyq kórme jobasy aıasynda uıymdastyryldy.
Jıynnyń ashylýynda sóz alǵan megapolıs basshysynyń orynbasary «Nazarbaev modeliniń» ereksheligine toqtaldy.
«Nazarbaev modeli» degende eń aldymen, konfessııaaralyq, ishki saıasaty, turaqtylyqty aıtamyz. Ekinshiden, osy ishki saıası turaqtylyq elimizge, Elbasyna óte qarqyndy túrde saıası, ekonomıkalyq reformalar júrgizýge múmkindik berdi. Úshinshiden, meniń oıymsha «Nazarbaev modeliniń» ereksheligi óte jaýapty syrtqy saıasatty júrgizýinde. 25 jyl ishinde birde bir memleketpen kıkiljińge kelgen emespiz. Astana Elbasynyń basty megajobasy», - dep atap ótti Qyryqbaev.
«Biz astanamyzdy aýystyrǵan jer betindegi saýsaqpen sanarlyq memleketter qataryndamyz. Jaqynda elordamyzdyń 20 jyldyǵyn toılaımyz. Astana - Elbasynyń basty jáne biregeı jobasy. Eldiń el bolýy úshin úlken jobalar kerek. Meniń oıymsha, 25 jylda Qazaqstannyń damýyn aıqyndaǵan mega joba osy - Astana qalasynyń salynýy. Sonymen qatar, biz mádenıetimizdi de túgendedik. «Mádenı mura» syndy úlken jobalar júzege asty. «Rýhanı jańǵyrý» baǵdarlamasyna bárimiz at salysyp jatyrmyz», - dedi Almaty qalasy ákiminiń orynbasary Arman Qyryqbaev.
Búgingi konferentsııa aıasynda M.Qasymbaekov, B.Temirbolat, T.Shaımergenov jazǵan «Nazarbaev modeli» kitabynyń tusaýy kesildi. Sonymen qatar, «Álem tanyǵan Kóshbasshy» kitap kórmesi ashyldy. Onda N.Nazarbaevtyń álemniń birneshe tilinde jaryq kórgen kitaptary qoıyldy.
Eske sala keteıik, Elbasy kitaphanasynyń «N.Nazarbaev: dáýir, tulǵa, qoǵam» kóshpeli jobasy QR Tuńǵysh prezıdenti kúni jáne Táýelsizdik kúni merekesi qarsańynda Almatyda kóshpeli qor kórmesimen ashylǵan bolatyn. Onda QR Prezıdenti Nursultan Nazarbaevtyń jeke arhıvi, jeke kitaphanasy jáne Mýzeı qorynyń jádigerleri qoıylǵan. Kórme QR Ortalyq memlekettik murajaıynda 2018 jyldyń 14 qańtaryna deıin ashyq bolady. Sonymen qatar, atalǵan joba aıasynda 10-16 qarasha kúnderi halyqaralyq ǵylymı-tájirıbelik konferentsııalar, semınar-trenıngter ótkizildi.
