Arman Qyryqbaev Tedjonda general Hon Bom Donyń rýhyna taǵzym etti
ASTANA. KAZINFORM – Memleket basshysynyń tapsyrmasymen Arman Qyryqbaev Tedjondaǵy general Hon Bom Do jerlengen memorıaldyq keshenge bardy.
Qazaqstan Respýblıkasynyń Prezıdenti Qasym-Jomart Toqaevtyń tapsyrmasymen Mádenıet jáne aqparat mınıstri Arman Qyryqbaev Tedjon qalasyndaǵy memorıaldyq keshenge baryp, sonda jerlengen kórnekti koreı qolbasshysy, general Hon Bom Donyń rýhyna taǵzym etti.
Aıta keteıik, mınıstr Koreıa Respýblıkasyna memlekettik saparmen barǵan Memleket basshysy bastaǵan resmı delegatsııa quramynda.
Keshende qurmet qaraýylynyń qatysýymen arnaıy rásim ótti. Arman Qyryqbaev el táýelsizdigi jolynda kúresip, Otanyn qorǵaýǵa ǵumyryn arnaǵan jandarǵa qurmet bildirip, memorıalǵa gúl shoǵyn qoıdy. Sondaı-aq general Hon Bom Donyń rýhyna taǵzym etti.
Tedjondaǵy bul memorıaldyq keshen Koreıa Respýblıkasyndaǵy asa mańyzdy taǵzym oryndarynyń biri sanalady. Munda elge aıryqsha eńbek sińirgen 150 myńǵa jýyq adam máńgilik tynys tapqan. General Hon Bom Donyń esimi Qazaqstan men Koreıany baılanystyratyn ortaq tarıhta aıryqsha oryn alady. Ol ómiriniń sońǵy jyldaryn Qazaqstanda ótkizip, Qyzylordada jerlengen edi. 2021 jyly Qazaqstannyń qoldaýymen onyń súıegi atamekenine jetkizilip, Tedjonda qaıta jerlendi.
Bıyl general Hon Bom Donyń súıegi Qyzylordadan Koreıa Respýblıkasyna jetkizilgenine bes jyl tolady. Onyń taǵdyr joly eki halyqty ózara jaqyndastyrǵan ortaq tarıhtyń taǵylymdy bir belesine aınaldy.
Sapar sońynda Arman Qyryqbaev qurmetti qonaqtar kitabyna estelik jazba qaldyrdy. Memorıaldyq keshendegi bul rásim eki eldiń tarıhı murasyna degen qurmetti aıǵaqtap, Qazaqstan men Koreıa arasyndaǵy baılanysty odan ári nyǵaıtýdyń mańyzyn kórsetti.
Aıta ketelik Koreıa Prezıdenti Toqaevqa general Hon Bom Donyń súıegin qaıtarǵany úshin alǵys aıtqan edi.
