Arman Qyryqbaev Prezıdent Ákimshiligi Kommýnıkatsııalar bóliminiń meńgerýshisi boldy
ASTANA. KAZINFORM — Aqordanyń resmı saıtynda Arman Qyryqbaevtyń jańa laýazymǵa taǵaıyndalǵany jarııalandy.
«Memleket basshysynyń ókimimen Arman Orazbaıuly Qyryqbaev Qazaqstan Respýblıkasy Prezıdenti Ákimshiliginiń Kommýnıkatsııalar bóliminiń meńgerýshisi laýazymyna taǵaıyndaldy», — dep jazylǵan aqparat kózinde.
Aıta keteıik, Arman Qyryqbaev 1976 jyly 20 qazanda Tselınograd qalasynda dúnıege kelgen. Qazaq memlekettik basqarý akademııasynyń, sondaı-aq Qazaqstan Respýblıkasy Syrtqy ister mınıstrliginiń Dıplomatııalyq Akademııasynyń túlegi bolyp tabylady. Mamandyǵy boıynsha halyqaralyq ekonomıst. Memlekettik qyzmette, mádenıet jáne jastar saıasaty salasynda 25 jyldan astam jalpy eńbek ótili bar.
Eńbek jolyn 1996 jyly Qazaqstan Respýblıkasy Syrtqy ister mınıstrliginiń referenti, attashesi bolyp bastaǵan. 1997-1999 jyldary - Qazaqstan Respýblıkasynyń Ózbekstandaǵy elshiliginiń attashesi, 1999-2000 jyldary-Qazaqstan Respýblıkasy Syrtqy ister mınıstrliginiń úshinshi hatshysy, keıin Qazaqstan Respýblıkasy Syrtqy ister mınıstrligi TMD isteri komıtetiniń ekinshi hatshysy. 2002-2004 jyldary – «ABE korporatsııasy» JAQ Strategııa jáne marketıng departamentiniń dırektory, 2004-2005 jyldary – «K-MART» JShS Bas dırektory.
2005 jyly Medeý aýdany ákiminiń orynbasary, 2005 jyldan 2006 jylǵa deıin Almaty qalasy jastar saıasatyn damytý memlekettik qorynyń dırektory, 2006 jyldyń sáýirinen 2008 jyldyń aqpanyna deıin Qazaqstan Respýblıkasy Mádenıet jáne aqparat mınıstrligi Qoǵamdyq-saıası jumys jáne jurtshylyqpen baılanys departamentiniń dırektory qyzmetterin atqarǵan.
2010 jyldyń qańtarynan 2012 jyldyń aqpanyna deıin Qazaqstan Respýblıkasy Mádenıet jáne aqparat Mınıstrligi Mádenıet komıtetiniń tóraǵasy, Qaraǵandy oblysy ákiminiń orynbasary qyzmetterin atqardy.
Arman Qyryqbaev 2012-2014 jyldary Qazaqstan Respýblıkasynyń Mádenıet jáne aqparat vıtse-mınıstri laýazymynda boldy. 2014-2015 jyldary Nur Otan partııasy tóraǵasy birinshi orynbasarynyń keńesshisi bolǵan. Sondaı-aq, 2015 jyldyń qazanynan 2019 jyldyń shildesine deıin Almaty qalasy ákiminiń ishki saıasat, densaýlyq saqtaý, bilim berý, mádenıet, jastar saıasaty, tilderdi damytý jáne basqa da máseleler jónindegi orynbasary qyzmetin atqardy.
