Arman Qalıev «Atyraý barysy» atandy
ATYRAÝ. QazAqparat - Halel Dosmuhamedov atyndaǵy Atyraý memlekettik ýnıversıtetiniń stadıonynda ótken qazaq kúresinen dástúrli «Atyraý barysy» týrnıriniń chempıony beldigin Qyzylqoǵa aýdanynyń balýany Arman Qalıevke buıyrdy, dep habarlaıdy QazAqparat tilshisi.
Salmaǵy týra 100 keli «Jas qyran» atty laqap atymen tanymal balýan aqtyq synda ózinen 20 keli artyq salmaqtaǵy jyloılyq Bekbolat Salyqovty jeńdi.
«Kezekti ret Atyraý oblysynyń atyn «Qazaqstan barysy» respýblıkalyqs týrnırinde qorǵaıtyn bolamyn. Men búgin óte qýanyshty sezimdemin. Búgingi jarysqa daıyndyǵym jaqsy boldy. Endi odan saıyn jattyǵýymdy arttyra túsip, Atyraýdan shyqqan «Qazaqstan barysy» atanǵym keledi», - deıdi jeńimpaz Arman Qalıev.
«Bıylǵy Atyraý barysy týrnıri ózgeshe, jańashyl formatta ótti. Tartymdy shoý uıymdastyrýǵa tyrystyq. Biz sporttyq keshenderdiń ishinde ótetin jarystardy, ásirese beldesý túrlerin kóp kóretinbiz. Bul joly ulttyq sportymyzdy ulttyq naqyshta, ashyq aspan aıasynda erekshe etip uıymdastyrýdy qolǵa alyp, joǵary deńgeıde ótkizdik», - deıdi Atyraý oblysynyń dene shynyqtyrý jáne sport basqarmasynyń basshysy Azamat Beket.
Úshinshi oryndy Atyraý qalasynyń balýany Amandyq Abylaı enshiledi. Balýanǵa 70 myń teńge syıaqy berilse, ekinshi oryn ıegerine 100 myń teńge jáne jarys jeńimpazyna 200 myń teńge qarjylaı syıaqy men chempıondyq belbeý tabys etildi. Jarystyń chempıony atanyp «Atyraý barysy-2018» belbeýine ıe bolǵan balýan jáne ekinshi, úshinshi oryn alǵan sportshylar respýblıkalyq «Qazaqstan barysy-2018» týrnırine joldama alyp, Atyraýdyń namysyn qorǵaıtyn bolady.
