Arman Evnıev aýyl sharýashylyǵy kooperatsııasynyń damýyna kedergilerdi atady
ASTANA. QazAqparat - Qazaqstanda qurylǵan aýyl sharýashyǵy kooperatıvteriniń 18 paıyzy jumys istemeıdi. Bul týraly búgin Úkimet otyrysynda QR Aýyl sharýashylyǵy birinshi vıtse-mınıstri Arman Evnıev aıtty, dep habarlaıdy QazAqparat tilshisi.
«2015 jyly «Aýyl sharýashylyǵy kooperatıvteri týraly» zańynyń qabyldanýy kooperatsııany damytýdyń negizgi kedergilerin joıýǵa múmkindik berdi. Atap aıtqanda, kooperatıv músheleri tabysty ózara bólisý quqyǵyna ıe boldy. Kooperatıv qyzmetine jyl saıyn aýdıt júrgizý úshin revızııalyq odaqtar ınstıtýtyn damytýǵa jaǵdaı jasaldy. 3 zańnyń ornyna 1 zań qoldanyla bastady. Arnaıy salyq rejimin aýyl sharýashylyǵy kooperatıvi de paıdalana alatyn boldy. Aýyl sharýashylyǵy kooperatıvteriniń qyzmet túrleri naqty sáıkestendirildi», - dedi aýyl sharýashylyǵy kooperatsııasyn damytý máselesi boıynsha baıandama jasaǵan vıtse-mınıstr.
Onyń aıtýynsha, aǵymdaǵy jylǵy 1 sáýirdegi jaǵdaı boıynsha statıstıkalyq derekterge sáıkes 62 myńnan astam adamdy biriktirgen 2 849 kooperatıv tirkelgen.
«Prezıdent Ákimshiliginiń tekserý qorytyndylary boıynsha aýyl sharýashylyǵy kooperatsııasynyń tıimdi damýyna kedergi keltiretin birqatar júıelik problemalar anyqtaldy. Bul: kooperatıvterdiń 18 paıyzynyń jumys istemeı turýy, 42 paıyzynyń formaldi túrde qurylýy; kooperatıv músheleri óndirgen ónimderdi óńdeýmen, ótkizýine qatysty problemalar; kooperatıvterdiń damýyn yntalandyrý sharalarynyń jetkiliksizdigi; aýyl sharýashylyǵy maqsatyndaǵy jerlerdiń jetispeýi; ákimdik derekteriniń statıstıkalyq derekterge sáıkes kelmeýi», - dedi ol.
Arman Evnıevtiń sózine qaraǵanda, qoldanystaǵy memlekettik baǵdarlamany ózekti etý jumysy barysynda agroónerkásiptik keshenniń aýyl sharýashylyǵy kooperatsııasy arqyly sheshýge múmkindik týatyn 6 túıindi problema anyqtalǵan.
«Olar: eńbek ónimdiliginiń tómendigi, ónimniń básekege qabilettiliginiń tómendigi, osynyń saldarynan óńdeýshi kásiporyndardyń tolyq júktelmeýi, tehnıkalyq jaraqtalý deńgeıiniń tómendigi, bilimniń jetispeýi, ónimdi satýdan túsetin kiristiń az bolýy, qosymsha shyǵyndardyń joǵary bolýy», - dedi vıtse-mınıstr.
