Arman Dáýletııarov: Tarıhı otanymdaǵy saılaýǵa atsalysý men úshin óte mańyzdy

NUR-SULTAN. QazAqparat - TMD atynan QR Prezıdentiniń saılaýyna baıqaýshy retinde kelgen Arman Dáýletııarov daýys berýshi jastardyń mol bolǵanyn atady, dep habarlaıdy QazAqparat tilshisi.

Reseılik «Mýz-TV» telearnasynyń bas dırektory baıqaýshy retinde saılaýdyń joǵary deńgeıde ótkenin aıtty.

«Óz basym eshqandaı quqyq buzýshylyq baıqaǵan joqpyn. Qazaqstan Prezıdentiniń saılaýy Halyqaralyq quqyq standarttaryna sáıkes ótýde. Adamdar belsendi daýys berip jatyr. Saılaý ýchaskelerinde bári uıymdastyrylǵan. Búgin 10-ǵa jýyq ýchaskege bardym. Halyq óte kóp. Keıbir ýchaskelerde tipti kezek qalyptasqan», - deıdi ol.

Qandasymyz ózi aralaǵan ýchaskelerde daýys berýshi jastardyń kóp bolǵanyn aıtady.

«Saılaýǵa kelgen jastar meni kórip tańdanysyp jatty. Keshe ǵana «Mýz TV» syılyǵynda júrgen meni búgin osy aradan kóremiz dep oılamasa kerek.Men úshin baıqaýshy retinde, qazaq retinde tarıhı otanymdaǵy saılaýǵa atsalysýym óte mańyzdy», - dedi Arman Dáýletııarov.