Arman Dáýletııarov Jibek Joly arnasynyń telejúrgizýshisi boldy

ASTANA. QazAqparat - «Mýz-TV» telearnasynyń burynǵy bas dırektory, tanymal medıamenedjer Arman Dáýletııarov qazaqstandyq Jibek Joly telearnasymen yntymaqtasa jumys isteý jospary jaıynda aıtty. Ol jobalardyń birinde telejúrgizýshi retinde qyzmet etedi, dep habarlaıdy QazAqparat.

«Basynda kelispegen edim. Óıtkeni osyǵan deıin ómirimde óner adamdarymen biraz ýaqyt birge jumys istegenmin jáne bul salaǵa qaıta oralamyn dep oılamaǵan edim. Al qazir endi osy baǵyttaǵy jobaǵa nege erterek kelispegen ekenmin degen tujyrym jasap otyrmyn. Birinshiden, bizge qonaqqa kelgen óner adamdarynyń 90 paıyzyn tanymaıdy ekenmin. Olardyń arasynda talantty mýzykanttar, ázilkeshter, shyǵarmashylyq adamdary bar. Bul adamdardyń ónerine tánti boldym», - dedi A. Dáýletııarov Astanada ótken SöZ Astana Public Talk alańynda ótken pikir almasý kezinde.

Osy oraıda ol jaqynda joba aıasynda ujym qazaqtyń toılaryna qatysty arnaıy túsirilim jasaǵanyn aıtty. Sonymen qatar tanymal prodıýser buǵan deıin Qazaqstandaǵy toı-bıznesi jaıynda estigenin, alaıda bul salany egjeı-tegjeıli zerttemegenin málim etti.

«Osydan 20 jyl buryn ózim úılengen kezdegi toıda qazaq ónerpazdary bolmaǵan edi. Jalpy, naǵyz qazaqy saltty dáripteıtin toılarda bolǵan emespin. Qazir asa kóp bılemeıtin sııaqtymyn jáne án de aıtpaımyn, biraq qazaqtyń toıyna baryp júrgen ónerpazdar erekshe kóńil-kúı syılady. Qazaq halqynyń toı ótkizýde óziniń ereksheligi bar. Atap aıtqanda, halqymyzdyń baı mádenı murasy bar. Qazaqstannan tys jerde turatyn qazaq retinde osy erekshelikti jete bilmedim jáne durys baǵalaı alamaǵan ekenmin. Óner adamdarymen kezdesken kezde, Qazaqstannyń ózine tán murasymen, dástúrimen tereń tanysa aldym. Sondyqtan bul baǵdarlamaǵa shaqyrǵanyna qýanyshtymyn», - dedi Arman Dáýletııarov.