«Arlannyń» jankúıerleri súıikti komandasyn qoshemetpen qarsy aldy
KÓKShETAÝ. QazAqparat - Qazaqstan tarıhynda tuńǵysh ret Qurlyq kýbogyn ıelenip, elge oralǵan Kókshetaýdyń «Arlan» hokkeı klýbyn jankúıerleri qujaq jaıa qarsy aldy, dep habarlaıdy QazAqparat tilshisi.
Astana áýejaıynda uıymdastyrylǵan sharada Aqmola oblysynyń dene shynyqtyrý jáne sport basqarmasynyń basshysy Áset Búkibaev pen Qazaqstan hokkeı federatsııasynyń tóraǵasy Andreı Sachýk sóz sóılep, «Arlan» hokkeı klýbynyń ujymyn jeńisterimen quttyqtady.
«Bul - otandyq hokkeı úshin úlken jeńis. Ony sózben aıtyp jetkizý múmkin emes. Sizder tamasha oıyn órnegi arqyly jankúıerlerińizge úlken syı jasadyńyzdar», - dedi Qazaqstan hokkeı federatsııasynyń tóraǵasy.
Óz kezeginde «Arlan» oıynshylary da bul jarysqa jaýapkershilikpen daıyndalǵandaryn aıtty.
«Jarystyń ońaı bolmaıtynyn o bastan bildik. Komandalardyń barlyǵy myqty, oıynshylary tájirıbeli edi. Sondyqtan, tyńǵylyqty daıyndaldyq. Bizge qoldaý bildirgenderińiz úshin ujym atynan alǵysymdy bildiremin», - dedi týrnırdiń eń úzdik oıynshysy atanǵan «Arlan» hokkeı klýbynyń shabýylshysy Evgenıı Gasnıkov.
Shara barysynda «arlandyqtardyń» qurmetine shaǵyn fleshmob uıymdastyrylyp, jankúıerler súıikti komandasymen estelik sýretke tústi.
Eske sala keteıik, jaqynda Kókshetaýdyń «Arlan» hokkeı klýby Irlandııada ótken Qurlyqtyq kýboktiń ıegeri atanǵan bolatyn. «Arlan» sońǵy sheshýshi matchta alań ıeleri - jergilikti «Belfast Djaıants» komandasyn býllıtten 3:2 B (2:0, 0:0, 0:2, 0:0, 1:0) esebimen utty.
