«Arlandardyń» Qytaıdaǵy aıqasyn elimizde tikeleı efırde kórsetedi
ASTANA. QazAqparat - Búkilálemdik boks serııasynda (WSB) óner kórsetip kele jatqan elordalyq «Astana arlandarynyń» kezekti «Qytaı aıdaharlaryna» qarsy ótkizetin aıqastaryn «Habar» telearnasy tikeleı efırde kórsetedi, dep habarlaıdy QazAqparat tilshisi.
Kezdesý 21 sáýir kúni Qytaıdyń Sanıa qalasynda ótedi. Bul «Astana Arlandarynyń» toptyq kezeńindegi sońǵy aıqasy. Boks keshiniń bastalýy Astana ýaqytymen saǵat 17:30-da.
Esterińizge sala keteıik, bul synda «arlandar» sapynan 52 keli salmaqta Anvar Muzapparov, 60 keli salmaqta Zákir Safıýllın, 69 keli salmaqta Aslanbek Shymbergenov, 81 keli salmaqta Arman Rysbek jáne 91 keliden aýyr salmaq dárejesinde Oljas Buqaev sharshy alańǵa shyǵady.
