Arlan Jańabaı Azııa oıyndarynyń qola júldegeri atandy
ASTANA. KAZINFORM — Japonııanyń Aıchı prefektýrasy men Nagoıa qalasynda ótip jatqan jazǵy Azııa oıyndarynda el qorjynyna alǵashqy qola júlde tústi. Qazaqstandyq trıatlonshy Arlan Jańabaı jarysta úshinshi oryndy ıelendi, dep habarlaıdy Týrızm jáne sport mınıstrligi.
Jarys nátıjesi boıynsha І oryndy japondyq Takaýmı Hodjo (52:56) ıelense, ІІ oryn Qytaı sportshysy Chjan Sıýjýıǵa (53:05) buıyrdy. Al otandasymyz Arlan Janabaı 53:11 kórsetkishimen ІІІ oryn minberinen kórindi.
Arlan Jańabaı úshin bul medal halyqaralyq arenadaǵy mańyzdy jetistikterdiń biri boldy. 2026 jyly ol Qytaıdyń Taıchjoý qalasynda ótken Azııa kýbogynyń kezeńinde qola, al Túrkistanda ótken kezeńde kúmis medal jeńip alǵan.
Bul medal qazaqstandyq trıatlon úshin erekshe mańyzǵa ıe. Buǵan deıin Azııa oıyndary tarıhynda otandyq sportshylar atalǵan sport túrinen bir ǵana qola júlde ıelengen bolatyn. Osylaısha, Arlan Jańabaıdyń nátıjesi Qazaqstannyń Azııa oıyndaryndaǵy trıatlonnan alǵan ekinshi júldesi atanyp, ulttyq quramanyń júıeli damýyn kórsetti.
Bul jetistik ulttyq quramanyń júıeli daıyndyǵy men elimizdegi trıatlondy damytý baǵytynda júrgizilip jatqan josparly jumystyń nátıjesi. Sońǵy jyldary beıindi federatsııamen birlesip sportshylardy daıarlaý júıesi jetildirilip, halyqaralyq jarys tájirıbesi keńeıtilip keledi. Azııa chempıonattary men ózge de iri halyqaralyq jarystarǵa qatysýǵa erekshe mán berilgen. Mundaı dodalarda jınaqtalǵan tájirıbe jattyǵý úderisin jetildirý jáne negizgi keshendi jarystarǵa daıyndyq barysynda eskeriledi.
Búginde trıatlon Qazaqstannyń 13 óńirinde qolǵa alynǵan. Sport túriniń geografııasyn keńeıtý, federatsııa men jattyqtyrýshylar quramynyń júıeli jumysy, sondaı-aq sport rezervin kezeń-kezeńimen daıarlaý ulttyq quramanyń aldaǵy nátıjelerin arttyrýǵa negiz qalyptastyrady. Arlan Jańabaıdyń Azııa oıyndaryndaǵy qola júldesi osy júıeli jumystyń taǵy bir nátıjesi boldy.
Aıta keteıik, Aıchı-Nagoıada ótip jatqan HH jazǵy Azııa oıyndary 4 qazanǵa deıin jalǵasady.
Buǵan deıin Arlan Jańabaı trıatlonnan Azııa kýbogy kezeńinde kúmis medal jeńip aldy.
