«Arlan» shaıbaly hokkeıden 2025 jylǵy Qazaqstan chempıony atandy

ASTANA. KAZINFORM - Kókshetaýlyq «Arlan» shaıbaly hokkeıden 2025 jylǵy Qazaqstan chempıony atandy.

Kókshetaýlyq komanda Qazaqstan chempıonaty pleı-off satysynyń fınaldyq kezeńinde tórtinshi oıyn qatarynan óskemendik «Torpedodan» basym túsip, jeńis tuǵyryna kóterildi.

Alǵashqy kezeńde qarsylastar bir-biriniń qaqpasyna gol sala alǵan joq. Oıynnyń 38-mınýtynda Stepan Sannıkov «Arlandy» alǵa shyǵarsa, Vladıslav Nıkýlın 39-mınýtta basymdyqty arttyrdy.

Oǵan úshinshi kezeńde «Torpedo» sapynan Maksım Bazanov bir golmen jaýap qaıyrdy.

Osylaısha «Arlan» qarsylasynan 2:1 esebimen basym túsip, bıylǵy chempıonatta jeńis tuǵyryna kóterildi.

Kókshetaýlyq klýb budan buryn atalǵan qarsylasynan úsh márte (3:2, 6:3, 9:2) basym túsken edi.

Qazaqstan chempıonaty 1992 jyldan beri turaqty túrde ótkizilip keledi. Qazirge deıin jeńimpaz ataǵyna óskemendik «Torpedo» 13 márte ıe bolsa, odan keıin «Beıbarys» (Atyraý) - 4, «Ertis» (Pavlodar) men «Saryarqa» - 3, «Barys» (Astana), «Nomad» (Astana), «Arlan» (Kókshetaý) -2,«Qazaqmys» (Sátpaev) pen «Bolat» (Temirtaý) -1 márte jeńis tuǵyryna kóterildi.