«Arlan» Qazaqstan chempıonaty fınaldyq kezeńin sátti bastady

ASTANA. KAZINFORM - Shaıbaly hokkeıden Qazaqstan chempıonaty pleı-off satysynyń fınaldyq kezeńi bastaldy. 

Jarystyń atalǵan satysynda kókshetaýlyq «Arlan» men óskemendik «Torpedo» komandalary baq synaıdy.

Alǵashqy matchta kókshetaýlyq komanda oıyn tizginin óz qolynda ustady. Nátıjesinde alǵashqy eki kezeńde qarsylas qaqpasyna jaýapsyz alty gol soǵyp úlgerdi. Sheshýshi úshinshi kezeńde taǵy úsh gol engizip, óz qaqpasyna eki shaıba jiberip aldy. 

Osylaısha «Arlan» alǵashqy matchta qarsylasynan 9:2 esebimen basym túsip, bas júldege qol sozýǵa jaqyndaı tústi. 

Endi aldaǵy oıyn 9 sáýirde Óskemende ótkiziledi. 

Odan keıingi oıyndar 13 jáne 15 sáýir kúnderine josparlanǵan. Jeńimpaz bir komandanyń tórt jeńisinen keıin anyqtalady. 

Aıta ketsek, budan buryn jartylaı fınalda «Arlan» qaraǵandylyq «Saryarqany», «Torpedo» ózbekstandyq «Hýmo» komandasyn qapy qaldyrdy.