Arktıkanyń baılyǵy 1 trln dollarǵa baǵalanyp otyr
ASTANA. QazAqparat - Arktıkanyń ınvestıtsııalyq áleýeti aldaǵy 15 jyldyq josparǵa sáıkes 1 trln dollarǵa baǵalanyp otyr.
Bul týraly Arktıka ekonomıkalyq keńesi hatshylyǵynyń dırektory Aný Fredrıkson málim etti, dep habarlaıdy TASS.
«Amerıkanyń Guggenheim Partners kompanııasy Arktıkanyń ınvestıtsııalyq áleýetin aldaǵy 15 jyldyq josparǵa sáıkes 1 trln dollarǵa baǵalap otyr. Osyǵan oraı oǵan qajetti ınvestıtsııa salynýy kerek. Fınlıandııada ótken Arktıka bıznes-forýmynda Norvegııa, Fınlıandııa, Shvetsııa jáne Reseı sııaqty soltústiktegi elderdiń ınvestıtsııalyq áleýeti kem degende 197 mlrd dollarǵa baǵalandy. Bul degeniń óte úlken qarjy»,-dedi ol.
Aný Fedrıkson sonymen qatar kómirsýtek naryǵyndaǵy sońǵy jyldarda kezdesken qıyndyqtarǵa da toqtalyp ótti. «Baǵa quldyrap bara jatyr dep aıta almas edim. Barentsev aımaǵynyń ınvestıtsııalyq áleýeti energetıkaǵa qurylǵan»,-dedi ol.
Arktıkalyq ekonomıkalyq keńes - halyqaralyq yntymaqtastyqty arttyryp Arktıkany ekonomıkalyq damytýǵa baǵyttalǵan halyqaralyq bıznes-forým. 2013 jyly qurylǵan keńes quramyna segiz arktıkalyq eldiń, sondaı-aq alty uıymnyń 42 múshe-ókili kiredi.