Arktıkanyń adam aıaǵy tımegen muzynan plastık tabyldy
NUR-SULTAN. QazAqparat – Arktıka álemniń azdaǵan lastanbaǵan jerleriniń qataryna engenmen, onda jaýǵan qardyń quramynda plastıktiń mıkroskopııalyq bólshekteri bar. Buny nemis jáne shveıtsar ǵalymdary anyqtady, dep habarlaıdy QazAqparat BBC-ge silteme jasap.
Germanııadaǵy Alfred Vegener atyndaǵy polıarlyq jáne teńiz zertteýleri ınstıtýtynyń jáne Shveıtsarııanyń qar men kóshkindi zertteý ınstıtýtynyń komandasy ótkizgen zertteýler nátıjesi Science Advances ǵylymı jýrnalynda jarııalandy.
Nemis ınstıtýtynyń zerthanasynda shyny qutylarǵa jınalǵan úlgilerdi zertteı kele, ǵalymdar qardyń árbir lıtrinen plastıktiń oń myńǵa jýyq mıkroskopııalyq bólshegin anyqtaǵan.
Bul – adam Arktıkaǵa kelse de aýamen birge osy bólshekterdi jutady degendi bildiredi. Mıkroplastıktiń adamnyń aǵzasyna áseri ázirge tolyq zerttelmegen.
Sondaı-aq, zertteýshiler qardan rezeńke jáne qatty talshyqtardyń (sıntetıkalyq bolýy múmkin) bólshekterin tapty.
Jalpy ǵalymdar qar sýynan kóp mıkrobólshekterdi anyqtady. Plastmassadan bólek onda tsellıýloza, qylshyqtyń bólshekteri tabyldy, sondaı-aq, rezeńkeli shınalardyń, laktar men boıaýlardyń bólshekteri bolǵan.
«Biz qandaı da bir lastanýdy anyqtaımyz degen oıda boldyq, alaıda mıkroplastıktiń osynshama mólsheri bizdi tań qaldyrdy», , - dedi ekpedıtsııa jetekshisi, professor Melanı Bergmann.
«Qardaǵy mıkroplastıkterdiń basym kópshiligi aýadan túsken bolýy kerek», - dedi ol.
