Arktıkadaǵy jylynýdyń jańa rekordty temperatýrasy resmı túrde aıtyldy
NUR-SULTAN. QazAqparat – Dúnıejúzilik meteorologııalyq uıym (DMU) Arktıkadaǵy jańa temperatýra rekordyn resmı túrde moıyndady – tselsıı boıynsha 38 gradýs. Halyqaralyq uıym sarapshylary ótken jazdyń kóp bóliginde Sibirdiń arktıkalyq aımaǵynda ortasha temperatýra normadan 10 gradýsqa joǵary bolǵanyn atap ótti. Bul týraly QazAqparat BUU jańalyqtaryna silteme jasap habarlaıdy.
«Búgin tańerteń Dúnıejúzilik meteorologııalyq uıymy Reseıdiń Verhoıansk qalasynda arktıkalyq temperatýra rekordy - Tselsıı boıynsha 38 gradýs nemese Farengeıt shkalasy boıynsha 100,4 bolǵanyn moıyndady. Ol ótken jyldyń 20 maýsymynda tirkelgen «, - dedi Dúnıejúzilik meteorologııalyq uıymnyń baspasóz hatshysy Kler Nýllıs.
«Bul rekord búkil Sibirdegi jylynýdyń aıqyn dáleli», - dedi áıgili brıtandyq klımatolog jáne DMU komıtetiniń múshesi Fıl Djons.
Verhoıansk polıar sheńberinen soltústikke qaraı 115 shaqyrymdaı jerde ornalasqan. Arktıkaǵa qaraǵanda Jerorta teńizine tán jańa temperatýra rekordy Sibirdiń uzaqqa sozylǵan ystyq tolqyny kezinde meteorologııalyq baqylaý stantsııasynda ólshendi. Saha (ıAkýtııa) respýblıkasynyń soltústik bóliginde ornalasqan Verhoıansk qalasyndaǵy meteostantsııada temperatýrany baqylaý 1885 jyldan beri júrgizilip keledi.
Atalǵan uıym sarapshylary Sibirdiń arktıkalyq aımaǵyndaǵy jazdyń joǵary temperatýrasy órtterdiń kúsheıýi men teńiz muzynyń jappaı erýine ákelgenin atap ótti. Arktıkadaǵy jylyný 2020 jyldy tarıhtaǵy eń jyly úsh jyldyń birine aınaldyrdy.
Sýret: twitter.com/tiksinews
