Arktıkada normadan joǵary temperatýra tirkeldi
NUR-SULTAN. QazAqparat – Arktıkada jylyný álemniń basqa jerlerine qaraǵanda úsh ese tez bolady. Sońǵy jarty ǵasyrda óńirdegi ortasha jyldyq temperatýra 3,1°C-qa kóterildi, bul kezde ǵalamshar boıynsha ortasha jyldyq temperatýra shamamen 1°C-qa ǵana kóterilgen. Bul týraly Arktıkalyq monıtorıng jáne baǵalaý baǵdarlamasy mamandarynyń jańa baıandamasynda málim etildi, dep habarlaıdy QazAqparat Euronews.com saıtyna silteme jasap.
Muz qabatynyń juqarýy jańa ekonomıkalyq múmkindikterge jol ashady. Olar: balyq aýlaıtyn jerler, keme júzetin marshrýttar, munaı men gazdyń jasyryn ken oryndary. Alaıda máńgi toń aımaqtarynyń degradatsııasy ósimdikter men janýarlardyń bir bútin túrleriniń joǵalýyna alyp keledi. Onyń ishinde aq aıý da bar.
Munyń saldaryn osy endikte turatyn tórt mıllıon adam sezinýde. Sonymen qatar Álemdik muhıttyń jalpy deńgeıiniń kóterilýine baılanysty úıleri bul jerden myńdaǵan kılometrde ornalasqandar da zardap shegýde.
Shvetsııa, Sibir men Alıaskada orman órtteri ádettegi problemaǵa aınaldy. Saldarynan mańyzdy parnıktik gazdardy sińirgishter onyń myqty kózine aınalyp, klımattyń ózgerý qarqynyn kúsheıtýde.
Osynshalyq tez jylynýdyń sebebin mamandar atmosferanyń joǵary qabattaryndaǵy joǵary qysymdy shaqyrǵan antıtsıklon dep sanaıdy. Saldarynan aspan tazaryp, qar erigen.
Klımatologtardyń aıtýynsha, jylyný odan da qarqyndy bolmaq. Jazǵy mezgilde joǵary atmosferalyq qysym muzdyń ýaqytynan erte erýine ákeledi.
