Arktıkada aq aıýdy óltirgender ustaldy
ASTANA. QazAqparat - Narıan-Mar polıtsııasy tabıǵat qorǵaýshylarmen birigip aq aıýdyń óltirilý qylmysyn ashty, dep habarlaıdy Dúnıejúzilik jabaıy tabıǵat qorynan (WWF).
«Narıan-Mar qalasynyń polıtsııasy Nenets avtonomdyq okrýginiń Tabıǵatty paıdalaný jáne qorshaǵan ortany qorǵaý ortalyǵynyń qyzmetkerlerimen birlesip aq aıýdyń óltirilýine baılanysty osy jylda ekinshi qylmysty ashty. Qylmysker halyqaralyq aq aıý kúniniń qarsańynda ustaldy», - delingen habarlamada.
Tártip saqshylary aq aıýdyń terisi men janýardyń eritilgen maıynyń bir lıtrin tárkilep, Arktıkadaǵy Karataıka jáne Varnek kentteriniń turǵyndary bolyp shyqqan eki kúdikti azamatty ustady. Olardyń biri - Vartek turǵyny aq aıýdy zańsyz óltirgenin, sodan keıin onyń terisin Karataıka kentine satýǵa jibergenin moıyndaǵan. Polıtsııa kóp uzamaı onyń túsinikterin rastap, aq aıýdyń eritilgen maıynyń bir lıtrin óz erkimen bergen Karataıka kentiniń turǵynyn ustady. Dúnıejúzilik jabaıy tabıǵat qory adamdarǵa arktıkalyq ańdardy óltirý - barynsha jazalaýdy qarastyratyn qylmys ekenin eskertedi.
