Arktıkada 56-45 mıllıon jyl buryn tropıkalyq klımat bolǵan

ASTANA. KAZINFORM - M.V.Lomonosov atyndaǵy Máskeý memlekettik ýnıversıteti geologııa fakýlteti qyzmetkerleriniń aıtýynsha, ystyq aýa raıy Soltústik Muzdy muhıttaǵy marjan rıfterine uqsas karbonatty qurylymdardyń paıda bolýymen qatar júrdi, dep jazady TASS.

M.V.Lomonosov atyndaǵy Máskeý memlekettik ýnıversıtetiniń geologııa fakýltetiniń qyzmetkerleri AQSh jáne Ulybrıtanııadaǵy áriptesterimen birlese otyryp, eotsen kezeńinde Arktıkada tropıktik klımat belgileri bolǵanyn málimdedi. Ystyq aýa raıy Soltústik Muzdy muhıttaǵy marjan rıfterine uqsas karbonatty qurylymdardyń paıda bolýymen qatar júrdi, dep habarlady ýnıversıtettiń baspasóz qyzmeti.

- Ǵalymdar Arktıkada eotsende (56-45 mıllıon jyl buryn) kúrt salqyndaǵan tropıkalyq klımat bolǵan degen qorytyndyǵa keldi. Bul jumys búkil Jer klımatynyń tarıhyn túsiný úshin mańyzdy, - delingen habarlamada.

Jumys avtorlary Soltústik polıýs mańynda eotsen dáýirine jatatyn marjan rıfterine uqsas ártúrli pishindegi karbonatty qurylymdardy ashty. Búginde mundaı qurylymdar ekvatorlyq jáne tropıktik aımaqtarda kezdesedi. Avtorlardyń aıtýynsha, Arktıkadaǵy tropıkalyq klımat kezeńi tez bastalyp, tez aıaqtaldy.

- Zertteý nátıjeleri boıynsha sońǵy 56 mıllıon jyldaǵy Arktıkada kenetten bolǵan klımattyq ózgeristerdi zertteý úshin arnaıy jańa halyqaralyq ǵylymı joba qurý usynylyp otyr, - dep atap ótti Máskeý memlekettik ýnıversıteti geologııa fakýltetiniń professory Anatolıı Nıkıshın.

Ǵalymdardyń qorytyndysy Gondwana Research jýrnalynda jarııalandy.