Árkim óz isine jaýapkershilikpen qarasa, jeke azamat ta, búkil el de tabysqa jetedi - Toqaev

ASTANA. KAZINFORM – Ulttyq quryltaıdyń úshinshi otyrysynda sóılegen sózinde Memleket basshysy Qasym-Jomart Toqaev qoǵamdyq ádildik jáne jaýapkershilik týraly sóz qozǵady.

«Kelesi qundylyq – ádildik jáne jaýapkershilik. Shyn máninde, bul memlekettiń de, qoǵamnyń da aınymas temirqazyǵy bolýǵa tıis. Barlyq salada ádildik bolsa, áleýmettik teńdik ornaıdy, tatýlyq pen kelisim nyǵaıa túsedi. Men memleket basshysy retinde Ádiletti Qazaqstandy qurýdy ózimniń basty mindetim dep sanaımyn. Prezıdent bolyp saılanǵan alǵashqy kúnderden bastap ádildik qaǵıdasyn qatań ustanyp kelemin. Bul ıdeıa 2022 jyly qyrkúıekte jarııalanǵan Joldaýymda tolyqqandy tujyrymdama retinde kórinis tapty. Osy oraıda «ádildik» uǵymynyń saıası rıtorıkada jáne tájirıbede qoldanylýy belgili bir syn-qaterler týyndatyp, azamattardy shamadan tys úmittendirip, olardyń bılikke talabyn kúsheıte túsýi múmkin degen pikir bar. Menińshe, bul ádildik uǵymynyń aıasyn taryltady, jurt ony ıgilikter men resýrstardy teń bólý dep qana qabyldaıdy. Shyn máninde, ádildik – eń aldymen, jurttyń bárine birdeı quqyq berý jáne jaýapkershilikti barshaǵa teń júkteý degen sóz»,-dedi Qasym-Jomart Toqaev.

Prezıdenttiń pikirinshe, ádildik pen jaýapkershilik – tyǵyz baılanysty uǵymdar.

«Basqasha aıtsaq, jaýapkershilik bolmasa, ádildik te bolmaıdy. Árkim óz isine, mindetine jaýapkershilikpen qarasa, jeke azamat ta, búkil el de tabysqa jetedi. Ádildiktiń qýaty – osynda»,-deıdi Memleket basshysy.