Árken Ótenov Strategııalyq josparlaý jáne reformalar agenttigi tóraǵasynyń orynbasary laýazymynan bosatyldy

ASTANA. KAZINFORM - Memleket basshysynyń ókimimen Árken Hamıtuly Ótenov Qazaqstan Respýblıkasynyń Strategııalyq josparlaý jáne reformalar agenttigi tóraǵasynyń orynbasary laýazymynan bosatyldy, dep habarlaıdy Aqordanyń baspasóz qyzmeti. 

Árken Hamıtuly Ótenov 1983 jyly 15 qarashada Almaty qalasynda týǵan. Ál- Farabı atyndaǵy Qazaq Ulttyq ýnıversıtetin, Karnegı Mellon ýnıversıtetin («Bolashaq» baǵdarlamasynyń túlegi, 2010) bitirgen. Halyqaralyq qatynastar mamany, ekonomıst, memlekettik saıasat salasyndaǵy ǵylym magıstri.

Árken Ótenov 2006-2011 jj. aralyǵynda eldiń bank salasynda qyzmet atqarǵan. Odan keıin Qazaqstan Respýblıkasy Prezıdenti Ákimshiliginde, Qarjy mınıstrliginiń Memlekettik kirister komıtetinde qyzmet atqarǵan.

2019 jylǵy tamyzdan jeltoqsanǵa deıin Qazaqstan Respýblıkasy Prezıdenti Ákimshiliginiń Syrtqy saıasat jáne halyqaralyq baılanystar bólimi meńgerýshisiniń orynbasary.

2019 jylǵy jeltoqsannan bastap 2020 jylǵy qyrkúıekke deıin Qazaqstan Respýblıkasy Syrtqy ister mınıstrliginiń Jaýapty hatshysy.

2020 jylǵy qazannan bastap Qazaqstan Respýblıkasynyń Strategııalyq josparlaý jáne reformalar jónindegi agenttigi Tóraǵasynyń orynbasary qyzmetin atqardy.

Dıplomatııalyq dárejesi - І synypty keńesshi.

Prezıdenttik jastar kadrlyq rezerviniń múshesi.