Árqaısymyz eldiń birligi úshin úles qosýǵa tyrysaıyq – Bas múftı

NUR-SULTAN. QazAqparat – Qazaqstannyń Bas múftıi, QMDB basshysy Naýryzbaı qajy Taǵanuly suıytylǵan gaz baǵasyna baılanysty narazylyqtardan keıin el turǵyndaryna beıneúndeý jasady, dep habarlaıdy QazAqparat.

«Qurmetti otandastar! Qadirli aǵaıyn! Ata-babamyzdyń armany bolǵan Táýelsizdigimizge osydan 30 jyl buryn qol jetkizdik. Qazirgi tańda osy Táýelsizdikti saqtaý – árbir qazaqstandyq úshin qasterli, qasıetti borysh. Alla Taǵala Táýelsizdigimizdi baıandy etsin. Tynyshtyǵynan aıyrylǵan el – juldyzy joq aspan ispetti deıdi. Tynyshtyq bolmasa, kásiptiń, dúnıeniń esh paıdasy bolmaıtyny barshańyzǵa belgili», - dedi Naýryzbaı qajy Taǵanuly.

Bas múftıdiń aıtýynsha, Alla Taǵala qasıetti Quranda «Jer betinde tynyshtyq ornaǵannan keıin búlik jasamańdar» deıdi.

«Qazirgi ýaqytta, qadrili aǵaıyn, barshamyzǵa birlik, baýyrmaldyq qajet. Sondyqtan barlyǵymyz Alladan eldiń birligin, tynyshtyǵyn suraıyq. Osy el úshin, eldiń birligi úshin árqaısysymyz shamamyz kelgenshe úles qosýǵa tyrysaıyq. Jaratýshy Alla Taǵala bizdiń elimizge, Otanymyzǵa aýyzbirshilik, yntymaq násip etsin! Alla til-kózden saqtasyn. Іshimizdi daýdan, syrtymyzdy jaýdan saqtasyn! Jaratýshy Jappar ıemiz qazaq halqyna aýyzbirshilik, yntymaq berip, eki dúnıeniń baqytyn násip etsin», - dedi Bas múftı.