«Arqarly taýynyń petroglıfteri» monografııasy nege az tırajben shyqty
ALMATY. KAZINFORM — Almatyda «Arqarly taýynyń petroglıfteri» atty monografııanyń tanystyrylymy ótti.
Monografııalyq eńbektiń tanystyrylymyna tarıhshylar, etnograftar, tanymal arheologtar men sýretshiler qatysty.
«Arqarly taýynyń petroglıfteri» monografııasy avtorlarynyń biri Aleksandr Gorıachevtiń sózinshe, Arqarly asýy — san ǵasyrlyq syr búkken qasıetti meken.
— Ǵylymı-zertteý jumystarynyń nátıjesinde jaryq kórgen monografııanyń mazmuny qundy tarıhı derekterge toly. Arqarly petroglıfterinde 2000 jyldyq tarıhtyń izi jatyr. Taý shatqaldarynda zerttelmegen, esh jerde tirkelmegen tańbaly tastar men oǵan qashalyp salynǵan alýan túrli sýretter tabyldy, — dedi ǵalym.
Álkeı Marǵulan atyndaǵy arheologııa ınstıtýty shyǵarǵan monografııa joǵary oqý oryndary men akademııalyq kitaphanalarǵa taratyldy.
— «Arqarly taýynyń petroglıfteri» monografııasy nebári 300 tırajben basylyp shyqty. Sebebi, bári qarjyǵa baılanysty. Sondyqtan, ony kitap dúkenderiniń sóresinen taba almaısyz. Degenmen, elektrondy nusqasy bar. Monografııany myna siltemeden júktep alýǵa bolady,— dedi ol.
Jetisý oblystyq tarıhı-mádenı murany qorǵaý ortalyǵynyń dırektory Ǵalymjan Ospanov atap ótkendeı, «Arqarly» kesheniniń týrıstik jáne bilim berý áleýeti zor. Ol Qazaqstannyń mádenı jáne týrıstik keńistiginde jańa jarqyn orynǵa aınalýy múmkin.
Buǵan deıin Álkeı Marǵulan atyndaǵy arheologııa ınstıtýtynyń ǵalymdary Arqarly asýyn zerttep, tańbaly tastar men obalardy, myńdaǵan jyl burynǵy qonystardy tirkep, qaǵaz betine túsirgenin habarlaǵan edik.
Keıin Arqarly petroglıfterin saqtaý memlekettik organdardyń baqylaýyna alynyp, Almaty oblysynyń jergilikti mańyzy bar tarıh jáne mádenıet eskertkishteriniń tizimine engizildi.