Arqar atqan Túrkistan oblysynyń turǵyny memleketke 15 mln teńge tóledi

Arqar atqan Túrkistan oblysynyń turǵyny memleketke 15 mln teńge tóledi, dep habarlaıdy Kazinform.

Zańsyz ań atý faktisi bıylǵy jyldyń maýsym aıynda tirkeldi. Sozaq aýdany Qozmoldaq aýylynyń turǵyny 8 maýsym kúni úıinde zańsyz saqtalǵan atys qarýyn alyp, aýylynan 15 shaqyrym jerde ornalasqan «Basqy aıryq» taýly saıyna arqar aýlaýǵa barǵan. Sodan saǵat 14:00 shamasynda sırek kezdesetin jáne quryp ketýi qaýpi tóngen arqar janýaryn atyp alǵan.

Inspektorlar zańsyz ań aýlaýshyny oqıǵa oryn alǵan aımaqtan ustady. Qarataý memlekettik tabıǵı qoryǵy qyzmetkerleri akt túzip, kúdiktiden atys qarýy men 18 dana oq jáne ańshy pyshaǵyn, arqardyń basy men sıraǵyn jáne etin tárkiledi. Atalǵan jaǵdaı boıynsha QK-tiń 287 babynyń 3-bóligi jáne 337 – baby 4 – bóliginiń 2,4) tarmaqtary boıynsha qylmystyq is qozǵalyp, tergeý júrgizildi. Nátıjesi boıynsha is sotqa ótti.

«Báıdibek aýdandyq sotynyń úkimimen sottalýshy QK-tiń 287 babynyń 3-bóliginde jáne 337 – baby 4 – bóliginiń 2,4) tarmaqtarynda kózdelgen qylmystardy jasaǵany úshin kináli dep tanyldy. Sondaı-aq, QK-niń 58 babynyń 3 bóligi negizinde onsha qatań emes jazany neǵurlym qatań jazaǵa sińirý boıynsha túpkilikti 7 jylǵa ańshylyq kásipshilikpen aınalysý quqyǵynan aıyra otyryp, 3 jylǵa bas bostandyǵynan shekteý jazasy taǵaıyndaldy. Sottalýshy memleketke zalal keltirgen 15 525 000 teńgeni tolyǵymen tóledi», - dedi Qarataý memlekettik tabıǵı qoryǵynyń zańgeri Qarlyǵash Jarmenova.