Arqany túzeıtin jattyǵýlar
ASTANA. QazAqparat - Qazirgi tańda adamdardyń kompıýter aldynda kóp otyrýyna baılanysty omyrtqasy áýelgi túzý qalpynan aırylyp qalyp jatady. Ol ózderine bilinbeýi múmkin. Syrt kózge birden baıqalady. Sol úshin nazarlaryńyzǵa arqany túzeıtin jattyǵýlar tizimin usynyp otyrmyz, dep jazady massaget.kz.
Túregep turý. Mundaı jaǵdaıda bizdiń bulshyq etterimiz jumys jasaıdy. Otyrǵan kúıdegige qaraǵanda, adam túregep turǵan kezde aǵzadaǵy kalorııa kóbirek joıylady. Mysaly, aıaldamada turǵanda nemese avtobýs ishinde kelesi jattyǵýdy oryndaýǵa bolady: ókshelerdi qatar qoıyp, basty joǵary kóterip, arqany tik ustańyz. Aıaqtaryńyzdy biriktirińiz. Tizelerińizdi búkpeýge tyrysyńyz. Birneshe mınýttaı osylaı turyp, keıin aıaqtaryńyzdyń arasyn alshaqtatyp, óz-ózińizdi erkin ustańyz. Bul jattyǵý áskerdegi «tik tur, erkin tur» degen buıryqty elestedi.
Іshińizben jatyp, shyntaqty búgip, bir alaqandy ekinshisine qosyp, ony mańdaıǵa deıin jetkizý kerek. Aıaǵyńyzdyń ushymen turyp, óksheni biriktirý kerek, jattyǵýdy jeńildetý úshin shkaf nemese dıvanǵa aıaqty tirese de bolady. Al endi deneni joǵary kóterip, qoldaryńyzdy bir ýaqytta eki jaqqa jaıý kerek. Iegińizdi joǵary kótermeýińiz kerek. Bastapqy qalpyńyzǵa oralyńyz. Keýdeńizdi kótererde tereń tynystańyz. Jattyǵýdy 6-10 ret qaıtalaǵan abzal.
Eki qolyńyzdy ıyqpen deńgeılestire edenge tireńiz de, tizerlep turyńyz. Qolyńyz ben sanyńyzdy keýdeńizge tikburyshty etip ustańyz. Tizeńizdiń arasyn sál alshaq ustańyz. Endi bir mezgilde oń qolyńyzdy alǵa joǵary kóterińiz de, sol aıaǵyńyzdy artqa sozyp jiberińiz. Bastapqy qalpyńyzǵa qaıta oralyp, jattyǵýdy 6-8 ret oryndańyz. Qol-aıaǵyńyzdy kótererde tereń demalyńyz.
Aıaǵyńyzdy arasyn qosyp, tizerlep turyńyz. Qolyńyzdy bastan asyra joǵary kóterip, alaqanyńyzdy alǵa qaratyńyz. Arqańyzdy tik ustap, moınyńyzdy sozyńyz. Jaılap birtindep alǵa qaraı eńkeıip, óksheńizben otyryńyz. Osy sátte ortan jiliktiń urshyq basy men tize býyndary qarqyndy jumys jasaıdy. Qoldaryńyzdy tómen túsirmeńiz, olar árdaıym sol qalpynda bolýy kerek. Basyńyz da qozǵalmaýy qajet. Tósińiz tizege tıgen kezde ıyq bulshyqetin bos ustap, basyńyzdy erkin jiberińiz. Arqa bulshyq etin qataıta alaqandaryńyzdy edennen serpe ıterip, bastapqy kúıge qaıta oralyńyz. Sodan keıin keýdeni tik qalypqa keltirińiz. Jattyǵýdy 4-8 ret qaıtalańyz.
