Arqany keńge salý áli erte – Qazaqstandaǵy epıdemıologııalyq ahýal qandaı
Prezıdentten bastap el Úkimetiniń epıdemıologııalyq ahýaldyń ekinshi tolqyny bolýy múmkin ekenin eskertip-aq keledi. Biraq soǵan qulaq asyp, óziniń jáne ózgeniń qaýipsizdigin oılaýdy shetke syryp tastaǵan otandastarymyz ortamyzda júr. Basqany bylaı qoıǵanda mıllıondap aıyppul salyp jatsa da kópshilikti jınap, toı jasaý tyıylmaı tur. Budan bólek, qoǵamdyq oryndardaǵy jaıbaraqattyq ta alańdatady.
Osy aptanyń basyndaǵy Úkimet otyrysynda talqylanǵan máselelerdiń alǵashqysy osy eldegi epıdemıologııalyq ahýal boldy. Jaǵdaı turaqtalyp kele jatqanymen, arqany keńge salýǵa áli erte. Óıtkeni, mamandar koronavırýs ınfektsııasynyń ekinshi tolqyny bolýy múmkin ekenin jarysa aıtyp jatyr. Qazir Eýropa elderinde vırýs juqtyrǵandar sany kún sanap ósip keledi. Al, bizdiń jurt qaýipsizdik sharalaryn saqtaýǵa áli de qulyqsyz. Bul ınfektsııa juqtyrý dereginiń kóbeıip ketýine sebep bolýy ábden múmkin. Sondyqtan qaýipsizdik sharalaryn qatań saqtaý kerek ekenin Densaýlyq saqtaý mınıstri taǵy eskertti.
Alǵashqy tolqynda balalardyń vırýs juqtyrý deregi tirkelmegen bolatyn. Balalardyń ımmýnıteti kúshti bolǵandyqtan, vırýsty jeńýge qaýqarly degen de mamandardyń pikri aıtylǵan edi. Biraq búgingi tańda jaǵdaı basqasha bolyp tur. Statıstıka boıynsha, elimizde 104 mektep oqýshysy koronavırýs juqtyrǵan bolyp shyqty. Úkimet basshysy Asqar Mamın qaýipti indettiń jańa tolqynyna daıyndyqty jyldamdatý kerektigin aıtty. Koronavırýs alǵash taralǵan ýaqytta bizge jeńil tımegen edi. Naýqastardy aýrýhanalarǵa ornalastyrýdyń ózi úlken máselege aınalǵanyn umytpaýymyz kerek. Sol sebepti Úkimet basshysy aýrýhanalardaǵy oryn sany men qajetti medıtsınalyq qural-jabdyqtardyń jetkilikti bolýyn qatań qadaǵalaýdy tapsyrdy. Densaýlyq saqtaý mınıstri qazir óńirderde turaqtandyrý qory jasaqtalǵanyn aıtty.
«Koronavırýs ınfektsııasynyń ekinshi tolqynynda dári-dármek tapshylyǵy bolmaıdy. Qazir óńirlerde medıtsınalyq preparattardyń eki aılyq qory bar. Sondaı-aq, elimizde 3000-nan astam ókpeni jasandy jeldetý apparaty bar. Apparattar sany aldaǵy ýaqytta artatyn bolady», - dep málimdedi Alekseı Tsoı.
Osy aptada Densaýlyq saqtaý vıtse-mınıstri Ajar Ǵınııat óńirlerdegi medıtsınalyq-sanıtarlyq alǵashqy kómek uıymdarynyń vırýs juqtyrǵan patsıentterdi qabyldaýǵa daıyndyq máselesin pysyqtady. Jıynǵa ambýlatorııalyq-emhanalyq uıymdardyń basshylary men óńirlerdegi Densaýlyq saqtaý basqarmalarynyń ókilderi qatysty. Onda halyqty dári-dármekpen qamtý, mobıldi brıgadalar jumysy, úıdegi statsıonardy uıymdastyrý, medıtsına qyzmetkerleri men turǵyndardy qorǵaý úshin qabyldanǵan epıdemııaǵa qarsy sharalar jóninde aıtyldy.
Bıyl indettiń alǵashqy tolqyny bastalǵan kezde syrt elderden kelgen azamattardyń ishinde vırýs juqtyrǵandardyń deregi kóp tirkeldi. El ishindegi saqtyq sharalaryn qansha ustanǵanmen syrttan kelgenderdiń esebinen kórsetkish ulǵaıdy jáne olar basqalarǵa juqtyrdy. Sol sebepti, shekaranyń arǵy jaǵynan keletinderdi qatań baqylaýdyń mańyzy joǵary. Elimizdiń Bas memlekettik sanıtar dárigeri memlekettik shekaradaǵy ótkizý pýnktterinde koronavırýstyq ınfektsııa aýrýynyń aldyn alý jónindegi sharalardy odan ári kúsheıtý týraly qaýly shyǵardy. Qaýlyǵa sáıkes, 6 qazannan bastap jolaýshylar tasymalyndaǵy tártipter ózgerip, karantındik talaptar kúsheıtiledi. Jańa qaýly tártibi boıynsha, shet el azamattary Qazaqstan Respýblıkasynyń Memlekettik shekarasynan ótkende kem degende 72 saǵat buryn alynǵan PTR ádisimen COVID-19-ǵa testten ótkeni týraly anyqtama bolmaǵan jaǵdaıda elge kirgizilmeıdi.
Sondaı-aq, Qazaqstan Respýblıkasyna shetelden avıareıstermen keletin barlyq adamdar termometrııadan, saýalnamadan ótedi jáne kem degende 72 saǵat buryn alynǵan PTR ádisimen COVID-19-ǵa testten ótkeni týraly anyqtamany usynýy tıis. Árıne, osy qaýly naqty júzege asatyn bolsa, eldegi epıdemıologııalyq ahýaldyń asyqynyp ketpeýine tosqaýyl bolar edi.
Qalaı degenmen, el ishindegi jaǵdaıǵa da qatań baqylaý jasaýdyń jóni bólek. QR Densaýlyq saqtaý mınıstrligi 4 qazandaǵy jaǵdaı boıynsha, koronavırýspen aýyrǵandar týraly aqparatty jarııalady. Onda koronavırýstyq ınfektsııadan 3 229 adam em qabyldap jatqany aıtyldy. Olardyń arasynda 74 jetkinshek bala bar. Statsıonarlarda 1 774 naýqas jatyr. 1 455 adam ambýlatorııalyq jaǵdaıda emdelýde.
Jalpy naýqastardyń arasynda 85 adamnyń jaǵdaıy nashar. Onyń ishindegi 13 naýqastyń jaǵdaıy asa qatty aýyr dep baǵalanǵan. 21 naýqas ókpeni jasandy jeldetý apparatynda jatyr. Osy sońǵy kórsetkishten-aq, eldegi epıdemıologııalyq ahýaldyń qandaı ekenin ańǵarýǵa bolady. Jalpy, elimiz boıynsha qaýipti indetpen aýyrǵandar sany 108177-ge jetip otyr. Al jazylǵandardyń sany sany – 103205.
Mysaly, ótken táýlikte elimiz boıynsha 71 adamda koronavırýs indeti PTR arqyly rastalyp aýyrǵany belgili boldy. Aımaqtar arasynda Shyǵys Qazaqstan men Nur-Sultan qalasynda kóp tirkelgen. Respýblıka boıynsha aýrý deregi tirkelgen kórsetkishterdi tómendegi tizimnen kóre alasyzdar.
Nur-Sultan qalasy - 14
Almaty qalasy - 1
Shymkent qalasy - 1
Aqmola oblysy - 4
Almaty oblysy - 4
Atyraý oblysy - 3
Shyǵys Qazaqstan oblysy - 18
Jambyl oblysy - 1
Batys Qazaqstan oblysy – 1
Qaraǵandy oblysy - 9
Qostanaı oblysy - 2
Mańǵystaý oblysy - 1
Pavlodar oblysy - 3
Soltústik Qazaqstan oblysy - 9
«Jaman aıtpaı, jaqsy joq» deıdi dana halqymyz. Osy bastan halyqqa eskertý bıliktiń de buqaralyq aqparat quraldarynyń da basty mindeti. Ary qaraı tártipke baǵynyp, qaýipsizdik talaptary men saqtyq sharalaryna berik bolý óz qolyńyzda. Іndettiń ekinshi tolqyny sharpıtyn bolsa, el ekonomıkasyna aýyr soqqy bolady, sharýamyz shatqaıaqtap, eńsemizdi kóterýimiz qıynǵa soqpaq.