Arqanmen joǵarǵy qabattan tústi: Oralda terezeden sekirmek bolǵan qarııa qutqaryldy
BQO polıtsııa departamentiniń baspasóz qyzmetinen málim etkenindeı, oqıǵa 31 shilde kúni shamamen saǵat 16.30-17.00 aralyǵynda Zachagan kentinde boldy.
«BQO PD jyldam qımyldaıtyn arnaıy jasaǵynyń qyzmetkerleri, polıtsııa maıory Álisher Ǵaısın, polıtsııa kapıtandary Sándibek Myrzaǵalıev pen Darhan Ǵalymov avtokólikpen ótip bara jatyp, kóp qabatty úılerdiń birinde tórtinshi qabattyń terezesinen aıaǵy salbyrap otyrǵan er adamdy baıqaıdy. Polıtseıler dereý kólikti toqtatyp, er adamdy qutqarýǵa júgiredi. Tártip saqshylarynyń biri úıdiń syrtynda qalyp, kóńilin aýlap, álgi adamdy áńgimege tartady. Qalǵan eki qyzmetker tez páterge kóteriledi, alaıda esik ishten qulyptaýly bolady. Sodan olar joǵarǵy qabattaǵy kórshilerine baryp, qolǵa ilikken quraldardyń kómegimen tómenge túsýge áreket jasaıdy. Biraq, qaýipsizdik úshin tómende jınalǵan adamdardan shynjyr arqan surastyrady. Kólikti súıreýge arnalǵan shynjyr arqany bar jas jigit polıtseılerge kómekke keledi. Ol basqalarǵa qaraǵanda, salmaǵy áldeqaıda jeńil ekenin aıtyp, ózin tómenge túsirýdi ótinedi. Sóıtip, jigit tereze aldynda otyrǵan qarııany aıaǵymen ishke qaraı ıterip kirgizgen. Al, jigitti polıtsııa qyzmetkerleri demep, qarttyń artynan ishke kirýine járdemdesken. Osylaısha, bári bir adamnyń ómirin ólim aýzynan arashalap qaldy. Artynan oqıǵa ornyna basqa da polıtsııa qyzmetkerleri men qutqarýshylar kelip jetedi. Qarııanyń ómirine esh qaýip joq ekenine kózi jetken jyldam qımyldaıtyn arnaıy jasaqtyń jaýyngerleri qoǵamdyq tártipti saqtaý boıynsha qyzmetterin atqarý úshin óz jumystaryna attanǵan», - dep habarlady vedomstvodan.
Eske sala keteıik, budan buryn Oral turǵyny óziniń búıregin shetelge satpaq bolǵanyn jazǵan edik.
Sondaı-aq. BQO-da turǵyn úı órtenip, jas otbasy baspanasyz qaldy.
