«Arqankergen» shekara beketindegi oqıǵadan keıin UQK tóraǵasynyń orynbasary Memleket basshysyna jumysynan bosatý týraly raport berdi
ASTANA. 13 maýsym. QazAqparat - «Arqankergen» shekara beketindegi oqıǵadan keıin Ulttyq qaýipsizdik komıteti tóraǵasynyń orynbasary Memleket basshysyna jumysynan bosatý týraly raport berdi. Bul týraly búgin brıfıng barysynda QR Bas áskerı prokýrory Erǵalı Merzadınov málim etti.
«Ulttyq qaýipsizdik komıteti tóraǵasynyń orynbasary - shekara qyzmetiniń dırektory general-maıor Nurjan Myrzalıev Elbasynyń atyna qyzmetinen bosatý týraly raport berdi», - dep atap ótti ol.
Sonymen qatar prokýrordyń sózine qaraǵanda, Ulttyq qaýipsizdik komıteti júrgizgen tergeýlerdiń nátıjesi boıynsha «Shyǵys» óńirlik basqarmasynyń, «Úsharal" shekaralyq jasaǵynyń jáne «Dostyq» shekaralyq komendatýrasynyń basshylyǵy qyzmetterinen bosatyldy.
«Basqa keıbir tulǵalardyń qylmystyq jaýapkershiligi týraly másele, eger ondaı bolsa, tergeý nátıjesimen sheshiledi», - dep qosty E.Merzadınov.
