Arqanyń quty: Baıanaýyldyń qar basqan taýlarynda arqar kózge tústi
PAVLODAR. KAZINFORM — Baıanaýyl ulttyq parkiniń dereginshe, búginde bul aýmaqta shamamen shamamen 800-ge jýyq arqar bar. Olar únemi taýly aımaqtarda tirshilik etip, taý shyńdarynda jaıylady.
Jergilikti tabıǵat janashyry, bloger Aman Qanat óz Instagram paraqshasynda /@Tabigatym/ Baıanaýyl taýlarynan dronmen túsirilgen áserli kadrlardy jarııalady. Vıdeoda taý shyńdarynda emin-erkin josyp júrgen bir top arqar beınelengen.
— Baıanaýyl memlekettik ulttyq tabıǵı parki! Arqar — tabıǵattyń kórki! — dep jazdy tabıǵat janashyry.
Arqar — elimizdiń «Qyzyl kitabyna» engen jabaıy janýar. Ertis-Baıan óńirinde jabaıy janýarlar sanynyń arta túsýi kóńil qýantady. Ádette arqarlar adamdardan alys, bıik taýlardyń qoınaýynda júredi jáne kamera obektıvine sırek túsedi.
Baıanaýyl ulttyq parki mamandarynyń aıtýynsha, bul aýmaqta shamamen 800-ge jýyq arqar bar. Olar negizinen Aqbettaý, Qyzyltaý, Jeltaý, Dalbataý, Qalmaqqyrǵan taýlaryn mekendeıdi.
Buǵan deıin Baıanaýylda jol jaǵalaı júgirgen arqar kadrǵa túsip qaldy. Janýardyń jol jaǵalaı júgirip, erekshe minez-qulyq tanytqany jeli qoldanýshylarynyń qyzý talqysyna túsken edi.
