Arqalyqtyń jylý berý júıeleriniń 87% tozǵan – Ákimdik qandaı shara qoldanady

ASTANA. QazAqparat – Arqalyqta 37 shaqyrym jylý júıesi bolsa, bıyl sonyń 7 shaqyrymy kúrdeli jóndeýden ótedi. Ábden eskirgen jylý júıeleri týraly Qostanaı oblysynyń ákimi Qumar Aqsaqalov aıtyp berdi, dep habarlaıdy QazAqparat tilshisi.

«Rasynda da, Arqalyq qalasynda respýblıka boıynsha eń tozyǵy jetken jylý júıeleri bar. Premer-Mınıstr tapsyrmasymen biz barlyq qalada tehnıkalyq aýdıt júrgizdik. 1 maýsymǵa qaraı aýdıt aıaqtalyp, qaı qalada, qaı bólikterinde naqty qansha shaqyrym tozǵan júıe baryn kórip otyrmyz. Arqalyqta 37 shaqyrym jylý júıesi bolsa, bıyl sonyń 7 shaqyrymy jóndeledi», - dep jaýap berdi Q. Aqsaqalov agenttik tilshisiniń suraǵyna.

Osylaısha, Arqalyqtaǵy jylý júıeleriniń tozý deńgeıi 87%-ten 67%-ke tómendeıdi.

«Al Prezıdent tapsyrmasyna saı, bul kórsetkish eń kemi 40%-ke deıin túsýi kerek. Ol úshin 2025 jyly da bul jumys jalǵasady, jobalyq-smetalyq qujattamalarymyz daıyn», - deıdi óńir ákimi.

Jalpy oblysta jylýmen jabdyqtaý jelilerinde apatty jaǵdaılardy boldyrmaý úshin bıylǵy qarjylandyrý 18 mlrd teńgege deıin ulǵaıtyldy. Bul ótken jylmen salystyrǵanda 14 esege kóp. Qarajattyń negizgi bóligi Qostanaı, Rýdnyı, Arqalyq jáne Lısakov qalalaryn jylýmen jabdyqtaýǵa baǵyttalǵan.