Arqalyqtan Astana men Qostanaıǵa áýe reısteri ashylýy múmkin
QOSTANAI. QazAqparat - Arqalyq qalasynan Astana men Qostanaıǵa ushý baǵyty ashylýy múmkin. Bul týraly Arqalyq qalasynyń ákimi Amantaı Balǵarınniń turǵyndarmen kezdesýinde belgili boldy, dep habarlaıdy QazAqparat.
Jıynda qalalyq «Arsenal» JShS basshysy Sábıt Ábdiqadyruly Arqalyqtan elordaǵa jáne Qostanaıǵa áýe baǵytyn ashý týraly usynys aıtty.
«Biz bul máseleni SCAT kompanııasymen birigip, taldadyq. Olar da qyzyǵýshylyq tanytty. Eger ákimdik tarapynan sýbsıdııa bólinse, áýe baǵytyn ashýǵa daıynbyz. Bizdegi ushý jolaqtary barlyq talaptarǵa saı keledi», - dedi Ábdiqadyruly.
Óz kezeginde Arhımed Muhambetov bul bastamany qoldaıtynyn aıtty. Degenmen, usynys bir-eki jylda iske asyrylmaıtyn boldy.
«Bastama durys. Biraq, áýeli, áýejaı salyp alý kerek qoı. Al biz qazirgi ýaqytta tek Qostanaı áýejaıyn qalypqa keltirýge qarjy bóldik. Osy jyly jóndeý jumystary bastalady. Qaıta jóndeýden ótken soń uzyndyǵy 2,8 shaqyrym jolaqqa ıe bolamyz», - dedi oblys basshysy.
Eske salaıyq, jıynda sóz bolǵan Qostanaıdyń halyqaralyq áýejaıy jekeshelendirýdiń ekinshi kezeńi aıasynda saýdaǵa qoıyldy.
