Arqalyqtaǵy «Jiger» stadıony kúrdeli jóndeýden ótedi
Arqalyq qalasy dene tárbıesi jáne sport bóliminiń quzyryndaǵy «Jiger» stadıony bıyl tolyq jóndeýden ótip, jańa oqý jylynda paıdalanýǵa berilmek. 1975 jyly irgesi qalanǵan nysan osy ýaqytqa deıin jóndeý kórmegen. Tek 2017 jyly stadıondaǵy fýtbol alańy aýystyrylǵan. Alań jıegine jasandy tósenishter men júgirý jolaqtary ornatyldy. Stadıon qazir 5000 adamdy syıdyra alady. Jóndeý jumystary aıaqtalǵan soń oryn sany da kóbeımek.
Arqalyq qalasy jumyspen qamtý ortalyǵynyń dırektory Álııa Tólegenovanyń aıtýynsha, stadıon «Jumyspen qamtýdyń jol kartasy-2020» baǵdarlamasy sheńberinde qalypqa keltiriledi. Joba boıynsha 16 adam turaqty jumyspen qamtylady. Olardyń 8-i – jumyspen qamtý ortalyǵynyń joldamasy arqyly alynǵandar. Qyzmetkerlerdiń jalaqysy 85000 teńgeden kem bolmaıdy.
«Jalpy Arqalyq qalasynda «Jumyspen qamtýdyń jol kartasy-2020» baǵdarlamasy aıasynda 10 iri joba iske asyrylady. Qazir 3 joba boıynsha qarajat bólindi. Sonyń biri – «Jiger» stadıonyna kúrdeli jóndeý júrgizý. Jóndeý jumystary sáýir aıynda bastalyp ketti. Onymen «Allıýmınstroı» JShS aınalysýda. Jobanyń quny – 65,2 mln teńge. Jumys barysynda ishki ınjenerlik jelilerdi aýystyrý jáne ishki árleý (syrlaý, aqtaý) qarastyrylǵan. Merdiger uıym bul jumystardy qyrkúıek aıyna deıin aıaqtaıdy», - dedi Álııa Tólegenova.
Aıta keteıik, Arqalyqta qurylǵan «Gornıak», «Torǵaı» sport klýbtary oıyndaryn osy «Jiger» stadıonynda uıymdastyryp turǵan. Keıin bul ujymdar jabylyp, stadıonda respýblıkalyq dárejedegi týrnırler ótkizilmedi.
