Arqalyqtaǵy taksı júrgizýshi: Aqpannyń basyna deıin turǵyndardy tegin tasımyn
QOSTANAI. QazAqparat - Arqalyq qalasy meshiti men jeke taksıshiler aıazdy kúnderi turǵyndarǵa tegin qyzmet kórsetip jatyr, dep habarlaıdy QazAqparat tilshisi.
Mundaı qaıyrymdylyq sharany Arqalyq qalalyq «Mýhtasıb Álmuhammed» meshitiniń qyzmetkerleri bastap qolǵa aldy. Din qyzmetkerleri aıazdy kúnderi kóshe aıaldamalarynda jolaýshylarǵa ystyq sháı men táttiler usynyp, tegin taksı qyzmetin kórsetýde. Qalalyq meshittiń bas ımamy Bektursyn Torǵaıbaıuly da óz kóligimen shyǵyp, kópke úlgi boldy.
Bul bastamany jeke taksıler de qoldady. Olar aýrýhana, ortalyq bazar, halyqqa qyzmet kórsetý ortalyǵy syndy halyq kóp jınalatyn oryndarǵa baryp, tegin qyzmet kórsetip jatyr.
«Muny búkil Qazaqstan boıynsha qolǵa alý kerek. Astanada bastalǵan isti biz de jalǵap otyrmyz. Qazirgideı sýyqta jol boıynda turǵan adamdardy jarysa alyp ketip jatqan áriptesterimdi kórgen ish jylıdy. Qala halqy batasyn berip, shynaıy alǵystaryn bildirip jatyr. Óz basym qaıyrymdylyq isti aqpan aıynyń basyna deıin jalǵastyramyn», - deıdi taksıshi Murat Janǵabylov.
