Arqalyqtaǵy naýqastyń ólimi koronavırýstan bolmaǵan – komıssııa qorytyndysy
ARQALYQ. QazAqparat – Qostanaı oblysynyń Arqalyq qalasynda qaıtys bolǵan naýqastyń ólimi koronavırýstan bolǵan joq. Koronavırýsty juqtyrǵan naýqastardyń ólim jaǵdaılaryn zertteý jónindegi komıssııa tujyrymynda osylaı delingen, dep habarlaıdy QazAqparat.
Aıta keteıik, Arqalyq qalasynda koronavırýs anyqtalǵan 84 jastaǵy keıýana óz úıinde kóz jumǵan bolatyn.
Soronavirus2020.kz saıtyndaǵy aqparatqa sáıkes, 27 sáýir kúni naýqastyń ólimi koronavırýstan, ne basqa syrqattan bolǵanyn anyqtaý úshin komıssııa ótkizildi.
«Zerttelgen medıtsınalyq qujattamaǵa sáıkes, patsıent 2020 jyldyń naýryz aıynan bastap tirkelgen orny boıynsha «3-dárejeli arterıaldyq gıpertonııa, 3-dárejeli qaýip, gıpertenzıvti entsefalopatııa» dıagnozymen Arqalyq qalalyq emhanasynda esepte turǵan.
Sońǵy eki aıda negizgi syrqaty boıynsha úıge birneshe ret jedel járdem shaqyrǵany anyqtaldy. Oǵan dálel - medıtsınalyq aqparattyq júıesi.
Joǵaryda baıandalǵannyń negizinde, sondaı-aq patsıenttiń jasyn jáne sozylmaly aýrýdyń bolýyn eskere otyryp, komıssııa naýqastyń ólimi júrek-qan qyzmetiniń jetkiliksizdiginen boldy degen qorytyndyǵa keldi. Koronavırýs qosalqy syrqat bolyp tabylady», - delingen málimette.
