Arqalyqtaǵy qus fabrıkasy jumysyn toqtatty

QOSTANAI.QazAqparat – Arqalyq qalasyndaǵy qala quraýshy kásiporyn «Agroınterqus» JShS jumysyn ýaqytsha toqtatty, dep habarlaıdy QazAqparat tilshisi.

Aqparatty agenttik tilshisine oblystyq veterınarııa basqarmasynyń basshysy Samat Qalıev rastady

«Qazaqstan Respýblıkasyndaǵy joǵary patogendi qus tumaýynyń taralýyna baılanysty kásiporynda 502 600 qus qyryldy. Sol sebepti qus fabrıkasynyń jumysy ýaqytsha toqtady. Fabrıkadan qus ónimderin shyǵarýǵa tyıym salyndy. Qazir óńirde arnaıy komıssııa jumys istep jatyr. Onyń quramynda QR Aýyl sharýashylyǵy mınıstrliginiń Veterınarııalyq baqylaý jáne qadaǵalaý komıteti jáne Respýblıkalyq epızootııaǵa qarsy jasaqtyń mamandary bar. Qus fabrıkasynyń qaı kezde jumysyn jalǵastyratynyn aıta almaımyz», - dedi Samat Qalıev.

«Agroınterqus» JShS basshylyǵynyń aıtýynsha, kásiporynnyń qyzmetin qaıta jalǵastyrý úshin kemi bir jyl qajet. Sonymen qatar jumystyń jandanýyna 1,5 mıllıard teńge qarajat jumsalady.

Arqalyqtaǵy qus fabrıkasy 1970 jyldan beri jumys istep keledi. 1992 jyly onyń toqtatylyp, 2008 jyly qaıta ashyldy. «Agroınterqus» kásipornynda 220 adamǵa jumys istep kelgen. Fabrıka jylyna 120 mln dana jumyrtqa óndirip, naryqqa shyǵaryp otyrdy.

Buǵan deıin qus tumaýyna baılanysty Qostanaı oblysynda 8 aýyldyń karantınge jabylǵany habarlandy.