Arqalyqta jetim balalarǵa tıesili azyq-túlikti urlap kelgen bas dáriger sottaldy

QOSTANAI.QazAqparat – Arqalyq qalalyq sotynyń úkimimen Qostanaı oblysy ákimdigi densaýlyq saqtaý basqarmasyna qarasty «Mamandandyrylǵan balalar úıi» mekemesiniń bas dárigeri sottaldy, dep habarlaıdy QazAqparat oblystyq sottyń baspasóz qyzmetine silteme jasap.

Arqalyqtaǵy Mamandandyrylǵan balalary úıiniń bas dárigeri aýyr sybaılas jemqorlyq jasaǵany úshin aıyptaldy. Іs derekterinde kórsetilgendeı, bas dáriger 2016-2019 jyldar aralyǵynda balalar úıine tıesili azyq-túlik ónimderin, sondaı-aq jalpy somasy 1 mln teńge bolatyn AI-92 markaly janar-jaǵarmaıdy jymqyrǵan. Jetim balalarǵa bólingen azyq-túliktiń jalpy somasy 3 mln teńgeden asady.

«Sot barysynda bas dáriger aıybyn moıyndamady, biraq onyń kinási jábirlenýshiler men kýágerlerdiń aıǵaqtarymen, qylmystyq is materıaldarymen, sondaı-aq ártúrli saraptamalardyń qorytyndylarymen dáleldendi. Ol QR QK 189-baby, 3-bóliginiń 2-tarmaǵy boıynsha aıyptaldy. Sot talqylaýy barysynda anyqtalǵan mán-jaılardy, jasalǵan qylmystyq quqyq buzýshylyqtyń aýyrlyǵy men qoǵamdyq qaýiptilik dárejesin, sottalýshynyń jeke basyn, keltirilgen zalaldy óteýdiń bolmaýyn eskere otyryp, sot oǵan múlkin tárkileýsiz 5 jyl bas bostandyǵynan aıyrýdy taǵaıyndady», delingen oblystyq sottyń baspasóz habarlamasynda.

Sonymen, Arqalyq mamandandyrylǵan balalar úıiniń bas dárigeri memlekettik qyzmette jáne basqa da uıymdarda laýazym qyzmetterdi atqarý quqyǵynan aıyryldy. Ol jazasyn qylmystyq-atqarý júıesiniń qaýipsizdigi ortasha mekemesinde óteıdi. Úkim zańdy kúshine engen joq.