Arqalyqta shujyq jáne konservi tsehy iske qosylady

Oblystyń et klasterin damytýǵa Arqalyq qalasy zor úlesin qospaq. Sebebi, munda qazan aıynda et óńdeý kesheni iske qosylady. Shujyq ónimderi men konservilengen et shyǵaratyn jańa óndiris orny jylyna 1 myń tonna daıyn ónim shyǵarady dep kútilýde. Arqalyq qalasynyń ákimi Eldar Kúzembaevtyń sózinshe, jobanyń jalpy quny - 2 mlrd teńge.

«Qazirgi ýaqytta ǵımarattyń ishki jumystary júrgizilip jatyr. Tóbesi men syrtqy árleý jumystaryn aıaqtadyq. Mal soıý pýnktine sendvıch panelder ornatylyp, jylý jáne jaryq júıesi júrgizildi. Osy jyldyń tamyz aıynda «Tobyl» kásipkerlikti qoldaý korporatsııasynan úsh paıyzben nesıe alyp, 500 mln teńgege qural-jabdyqtar satyp alyndy. Onyń ishinde Polshadan etti qaıta óńdeıtin qurylǵy aldyrdyq. Quny 250 mln teńge turady. Endi Arqalyqta et ónimderi kóbeıedi. Steık, shujyq taǵamdary ózimizden shyǵady», - dedi Eldar Kúzembaev.
 

Et kombınatyna Ýkraınadan quny 42 mln teńge bolatyn konservileý apparaty ákelindi. Sondaı-aq, joba jetekshisi «Torǵaı-Et» JShS Qytaıdan konservilengen ónimdi qaınatýǵa arnalǵan jabyq qazandyq satyp aldy. Buǵan15 mln teńge jumsaldy.

Mal soıý tsehynda ishek-qaryn tazalanatyn jáne teri saqtaıtyn qoıma bar. Sıyr eti tońazytqyshtarda -36 gradýs temperatýrǵa deıin saqtalady. Aıta keteıik, shujyq jáne konservi tsehy basqa óńirlerden tehnologtar kelgen soń óz jumysyn bastaıdy.

Et kombınatynda turaqty 120 jumys orny ashylady. Óz kezeginde Arhımed Muhambetov jergilikti kadrlardy daıyndaý jumystaryna basa nazar aýdarý qajettigine toqtaldy. 

«Qashanǵy ár jerden maman izdep júresizder. Arqalyqtyń jastaryn oqytyńyzdar.Qazir biliktilikti arttyratyn arnaıy kýrstar bar. Kem degende 3-4 jyl oqıdy. Sodan keıin jergilkti kadrlardyń sapasy jaqsarady», - dedi oblys ákimi.

Arqalyqtyń et kombınaty 1997 jyly óz jumysyn toqtatqan bolatyn. Byltyr ındýstrııalyq-ınnovatsııalyq damý memlekettik baǵdarlamasy aıasynda óndiris orny jumysyn qaıta jandandyrdy.