Arqalyqta polıtsııadan kólikpen qashqan jasóspirimge qatysty oqıǵanyń mán-jaıy belgili boldy

NUR-SULTAN. QazAqparat – Qostanaı oblysy Polıtsııa departamenti polıtsııa qyzmetkerlerinen kólikpen qashqan kámeletke tolmaǵanǵa qatysty túsinik berdi, dep habarlaıdy QazAqparat Polisia.kz saıtyna silteme jasap.

Arqalyq qalasy patrýldik polıtsııa vzvodynyń aǵa serjanty Aman Ospanov ishki ister organdarynda 2014 jyldan beri qyzmet etip keledi. Ol áriptesi Murat Jamalıev ekeýi sol kúni órt sóndirýge qatysty oqıǵa ornynan kele jatqan edi. Polıtseıler jol boıynda Mitsubishi Pajero kóligin kórip, ondaǵy júrgizýshiniń kúdikti áreketin baıqap qalady. Kólik júrgizýshisi qozǵalys kezinde qaıta-qaıta kilt toqtaı bergen kórinedi.

Kýáger Sabyrjan Lekerovtiń aıtýynsha, 31 mamyr kúni Jánibek kóshesi boıynda patrýldik mashına jol talǵamaıtyn kólikti qýyp jetip toqtatýǵa tyrysqan. Alaıda djıp júrgizýshisi eskertýlerge qaramastan, jyldamdyǵyn túsirmesten júıtkı jónelgen. Qatty júrgen kólik kóshe boıynda júrgen adamdarǵa qaýip tóndirgen.

Polıtsııa qyzmetkeriniń sózine qaraǵanda, bul oqıǵada basty maqsat qaıǵyly oqıǵaǵa jol bermeý boldy.

«Jol boıynda adamdar boldy jáne olarǵa qater tóndi. Sondyqtan atalǵan kólik quralyn toqtatý týraly sheshim jasadyq. Eskertý retinde tapanshadan aýaǵa oq attym, alaıda kólik toqtamady. Keıinnen kóliktiń artqy dóńgelegin kózdep oq attym. Dóńgelegi jarylsa da, ol 500 metr jerdegi úıine deıin júrip bardy. Sol kezde ǵana kólikti jasóspirim tizgindegenin baıqadym. Kólik bıik bolǵandyqtan ony kim basqaryp otyrǵanyn aldynda kórmegen edik», - dedi Aman Ospanov.

Belgili bolǵandaı, balanyń 35 jastaǵy ákesine 2015-2018 jyldar aralyǵynda kólik basqarýǵa shekteý jasalǵan edi.

Sonymen qatar, oǵan qatysty Ákimshilik quqyq buzýshylyq týraly kodekstń 612, 613-baptary boıynsha eki hattama toltyryldy. Jaqyn arada Arqalyq qalasynyń soty jasóspirimniń ákesine qatysty Ákimshilik quqyq buzýshylyq týraly kodekstiń 127-baby boıynsha (Kámeletke tolmaǵan adamdy tárbıeleý jáne oǵan bilim berý, onyń quqyqtary men múddelerin qorǵaý jónindegi mindetterdi oryndamaý) sheshim qabyldaıdy.

Bul jaǵdaıǵa qatysty is-áreketter qala ákimdiginiń kámeletke tolmaǵandar isteri boıynsha komıssııada qaraldy. Onda eskertý merzimine baılanysty sheshim qabyldandy.